نگران وزیر اعظم جسٹس (ر) ناصر الملک دا شاہانہ پروٹوکول، نواز شریف نوں وی پچھے چھڈ دتا

نگران وزیر اعظم جسٹس (ر) ناصر الملک دا شاہانہ پروٹوکول، نواز شریف نوں وی پچھے چھڈ دتا

اسلام آباد( پاکستان پوائنٹ نیوز04۔جون2018ء ) نگران وزیر اعظم جسٹس (ر) ناصر الملک دا شاہانہ پروٹوکول، نواز شریف نوں وی پچھے چھڈ دتا۔تفصیل مطابق ملک وچ نگران سیٹ اپ دے تحت پہلی جون نوں جسٹس (ر) ناصر الملک نے نگران وزیر اعظم دے طور اُتے اپنے عہدے دا حلف چُکیا۔ ملک اندر ایہ گل عام ویکھن نوں آؤندی اے کہ کوئی وی سیاسی رہنما الیکشن وچ کامیاب ہون توں پہلاں بھاویں کِنی وی سادہ زندگی لنگھائے پر اقتدار وچ آؤندے ای اوہدی ہوا ای بدل جاندی اے۔

بلٹ پروف گڈیاں، باڈی گارڈز تے پروٹوکول رکھے ایہ سیاستدان جدوں باہرلے ملک جاندے نیں تے کوئی اوہناں ول ویکھدا وی نہیں اے۔تازہ اطلاع مطابق ملک اندر نگران سیٹ اپ آؤندے ای لوکائی دی آس سی کہ شاید ایس شاہانہ پروٹوکول دے کلچر نوں ختم کیتا جائے گا پر نگران وزیر اعظم جسٹس (ر) ناصر الملک نے تے پروٹوکول وچ سابق وزیراعظم نواز شریف سنے سارے سیاستداناں نوں پچھانہ چھڈ دتا۔

جدی شہر سوات اپڑدے ای نگران وزیراعظم جسٹس (ر) ناصر الملک نال ڈیڈھ درجن توں ودھ گڈیاں دا قافلا سی۔ ایہو نہیں نگران وزیر اعظم آپ ہیلی کاپٹر وچ سوار ہو کے جدی شہر آئے۔ اوہناں دا ایہ پروٹوکول ویکھ کے سیاسی مبصرین دا کہنا ا ے کہ صرف دو مہینیاں لئی عہدہ سنبھالن والے نگران وزیر اعظم کوئی چنگی مثال قائم نہیں کر رہے۔ اک پاسے چیف جسٹس پروٹوکول دا نوٹس لیندے ہوئے سیاستداناں توں گڈیاں واپس لے رہے نیں تے دوجے پاسے نگران وزیر اعظم ٹھاٹھ باٹھ وچ سبھ نوں پچھانہ چھڈ رہے نیں۔