اسلام آباد( پاکستان پوائنٹ نیوز01۔جون2018ء ) نگران وزیراعظم جسٹس (ر) ناصر الملک دا پرچا کاراں نال غیر رسمی گل بات کردے ہوئے کہنا سی کہ الیکشن ہوئے گا تے ضروری ہوئے گا۔ عام انتخابات ویلے سِر ہون گے۔ تفصیل مطابق نگران وزیراعظم ناصر الملک نے اپنے عہدے دا حلف چُک لیا اے تے ہن نگران وزیراعظم جسٹس (ر) ناصر الملک وزیر اعظم ہاؤس وی اپڑ گئے نیں، جتھے اوہناں نوں گارڈ آف آنر پیش کیتا گیا۔
نگران وزیراعظم جسٹس (ر) ناصر الملک دا پرچا کاراں نال غیر رسمی گل بات کردے ہوئے کہنا سی کہ الیکشن ہوئے گا تے ضروری ہوئے گا۔ عام انتخابات ویلے سِر ہون گے۔میں الیکشن کروان آیا واں۔ تے متھے ویلے اُتے الیکشن کراواں گے۔ نگران وزیر اعظم جسٹس (ر) ناصر الملک دا ہور کہنا سی کہ نگران کابینہ دا حجم گھٹو گھٹ رکھاں گا۔ چھیتی ای نگران کابینہ طے کر لواں گے۔
اوہناں نے ہور آکھیا کہ میں الیکشن کمیشن دی مدد کراں گا۔ چیتے رہوے کہ نامزد نگران وزیر اعظم جسٹس(ر) ناصر الملک 17اگست 1950نوں سوات دے شہر مینگورہ وچ پیدا ہوئے۔ ایبٹ آباد پبلک سکول توں میٹرک تے ایڈورڈز کالج پشاور توں گریجویشن کیتا۔ 1977وچ لندن توں بار ایٹ لاء کرن مگروں پشاور وچ وکالت شروع کیتی، 1981وچ پشاور ہائی کورٹ بار دے سیکرٹری تے 1991تے 1993وچ صدر چُنے گئے۔
جسٹس(ر) ناصر الملک 4جون 1994نوں پشاور ہائی کورٹ دے جج بنے تے 31مئی 2004نوں چیف جسٹس پشاور ہائی کورٹ دے عہدے اُتے فائز ہوئے تے 5اپریل 2005نوں اوہناں نوں سپریم کورٹ دا جج لایا گیا۔ جسٹس(ر) ناصر الملک نے نہ صرف 3نومبر 2007دے پی سی او دے تحت حلف چُکن توں انکار کیتا بلکہ اوہ 3نومبر نوں ایمرجنسی خلاف حکم امتناع جاری کرن والے 7رکنی بنچ وچ وی شامل سن۔
پی سی او دے تحت حلف نہ چُک کے اوہ معزول قرار پائے تے ستمبر 2008وچ پیپلز پارٹی دے دور حکومت وچ فیر حلف چُک کے جج دے عہدے اُتے بحال ہوئے۔جسٹس(ر) ناصر الملک پی سی او، این آر او تے 18ویں ترمیم خلاف درخاستاں دی سنوائی کرن والے بینچاں دا وی حصہ رہے۔ سابق وزیراعظم یوسف رضا گیلانی نوں توہین عدالت دے جرم وچ سزا سنان والے بنچ دے سربراہ وی اوہی سی۔ جسٹس(ر) ناصر الملک پاکستان دے 22ویں چیف جسٹس سن جو جولائی 2014توں اگست 2015تیکر ایس عہدے اُتے رہے۔
