اسلام آباد( پاکستان پوائنٹ نیوز31۔مئی2018ء ) الیکشن کمیشن آف پاکستان نے عام انتخابات 2018دے شیڈول دی منظوری دے دتی اے، ملک وچ عام انتخابات 25جولائی نوں ای ہون گے، چیف الیکشن کمشنر نے سمری اُتے دستخط وی کر دتے نیں، 2جون توں 6جون تیکر امیدوار کاغذات نامزدگی جمع، 29جون نوں انتخابی نشان الاٹ ہون گے، فوج دی نگرانی وچ 21کروڑ توں ودھ بیلٹ پیپرز چھاپے جان گے، فرانس تے برطانیہ توں پیپر امپورٹ کیتا گیا اے۔
میڈیا رپورٹس مطابق سیکرٹری الیکشن کمیشن بابر یعقوب نے عام انتخابات 2018دے شیڈول دا اعلان کر دتا اے۔ اوہناں نے آکھیا کہ عام انتخابات بارے لوکائی وچ بے چینی کھلری ہوئی اے۔ پر ملک وچ عام انتخابات جولائی نوں ای ہون گے۔ اوہناں نے آکھیا کہ اج الیکشن کمیشن انتخابات 2018لئی انتخابی شیڈول جاری کر رہیا اے۔ اسیں انتخابی شیڈول قانون مطابق جاری کیتا اے۔
اوہناں نے الیکشن شیڈول دا اعلان کردے ہوئے آکھیا کہ عام انتخابات بارے ریٹرنگ افسر کل پبلک نوٹس جاری کرے گا۔ ایس طرحاں الیکشن کمیشن اپنا کم جاری کر دیوے گا۔ جیہدے تحت دو جون توں 6جون تیکر امیدوار کاغذات نامزدگی جمع کروا سکن گے۔ 7جو ن نوں امیدواراں دی لسٹ جاری کیتی جائے گی جدکہ 14جون تیکر امیدواراں دے کاغذات نامزدگی سکروٹنی کیتی جائے گی۔ اوہناں نے دسیا کہ امیدواراں دی حتمی لسٹ 27جونن نوں جاری کیتی جائے گی۔ جدکہ سارے امیدوار اپنے کاغذات نامزدگی 28جون نوں واپس لے سکن گے۔ ایس طرحاں سارے انتخابی امیدواراں تے سیاسی جماعتاں نوں 29جون نوں انتخابی نشان الاٹ ہون گے۔ اوہناں نے آکھیا کہ 25جولائی توں پہلے سارے معاملات حل ہو جان گے۔
