اسلام آباد( پاکستان پوائنٹ نیوز31۔مئی2018ء ) وزیر قانون پنجاب رانا ثناء اللہ خاں نے آکھیا اے کہ گورنر پنجاب ناصر کھوسہ دا اج رات تیکر آئینی طور اُتے نوٹی فکیشن جاری کر سکدے نیں، جے گورنرصاحب نوٹی فکیشن جاری نہیں کردے تے معاملا پارلیمانی کمیٹی یاں الیکشن کمیشن کول جائے گا، پی ٹی آئی نے ہن فیر دو ناں دتے، ہن پی ٹی آئی اُتے کیویں یقین کر سکدے آں؟مسلم لیگ (ن) دے رہنما خواجا سعد رفیق، زاہد حامد تے رانا ثناء اللہ الیکشن کمیشن دے دفتر وچ انتخابی ضابطہ اخلاق دے حوالے نال اجلاس مگروں میڈیا نال گل بات کر رہے سن۔
وفاقی وزیر ریلوے خواجا سعد رفیق نے آکھیا کہ پاکستانی قوم چاہندی اے کہ 25جولائی نوں الیکشن ہون۔ خشی دی گل اے کہ الیکشن کمیشن 25جولائی نوں الیکشن کروان لئی پرعزم اے۔ اوہناں نے آکھیا کہ انتخابی ضابطہ اخلاق لئی ساڈی پارٹی نے بہت محنت کیتی اے۔ شفاف الیکشن لئی الیکشن کمیشن نوں صلاحواں دتیاں نیں۔اوہناں دا کہنا سی کہ نگران وزیر اعلا دے معاملے اُتے پی ٹی آئی نے یوٹرن لے لیا اے۔
اس طرحاں کدی نہیں ہویا کہ اتفاق مگروں فیصلا واپس لیا جائے۔ وزیر اعلا پنجاب تے اپوزیشن لیڈر وچ نگران وزیر اعلا لئی تن وار صلاح ہوئی۔ آئین مطابق ناصر کھوسہ دا ناں طے کیتا گیا اے۔ فیر ناصر کھوسہ دے ناں اُتے پراپیگنڈا کیتا گیا۔ ہن اوہناں نے کنفیوژن پیدا کر دتی اے۔ اوہناں نے آکھیا کہ پی ٹی آئی نے ہن دو ناں دتے نیں اوہناں اُتے غور کیتا جائے گا کیونکہ ناصر کھوسہ لئی گورنر اج رات تیکر آئینی و قانونی نوٹی فکیشن جاری کر سکدے نیں جے اوہ نہیں نوٹی فکیشن جاری کردے تے فیر ویکھیا جائے گا کہ ہن ناں پارلیمانی کمیٹی وچ جائے گا یاں الیکشن کمیشن کول۔
