لاہور( پاکستان پوائنٹ نیوز31۔مئی2018ء ) پاکستان مسلم لیگ (ن) دے صدر و وزیر اعلا پنجاب میاں محمد شہباز شریف نے آکھیا اے کہ اج رات 12وجے توں بعد بجلی دی لوڈشیڈنگ ہوئی تے ساڈی ذمے واری نہیں اے، اسیں اپنا امتحان پاس کر لیا، بجلی دی لوڈشیڈنگ ختم کر دتی، ایہ نہیں آکھدا کہ بجلی دی لوڈشیڈنگ 100فیصد ختم کر دتی، انتخابات ویلے سِر ہونے چاہیدے، بلوچستان وچ انتخابات ملتوی کروان دی تحریک منظور ہونا چنگی گل اے۔
اوہناں نے اج لاہور وچ اک تقریب نال خطاب کردے ہوئے آکھیا کہ اج رات 12وجے توں بعد جے بجلی دی لوڈشیڈنگ ہوندی اے تے لوکائی مینوں، نواز شریف یاں ساڈی حکومت نوں ذمے وار نہیں آکھے گی۔ کیونکہ اسیں بجلی دی لوڈشیڈنگ ختم کر دتی اے۔ اسیں اپنا امتحان پاس کر لیا، بجلی دی لوڈشیڈنگ ختم کر دتی، ایہ نہیں آکھدا کہ بجلی دی لوڈشیڈنگ 100فیصد ختم کر دتی۔جون وچ سخت گرمی اے پر بجلی دی لوڈشیڈنگ نہ ہون دے برابر اے۔
اوہناں نے آکھیا کہ میرے علاج اُتے 60ہزار ڈالر خرچا آیا۔ ڈر اے نیب ایہ نہ پُچھے کہ 60ہزار ڈالر کتھوں آئے؟نیب دی وجہ توں ڈرے ہوئے آں۔ حد توں ودھ کوئی پش نہیں کر سکدا، اک ماحول بن گیا اے۔ بددیانتی کرن والیاں نوں پُچھیا نہیں جاندا۔ اوہناں نے آکھیا کہ اسیں پاکستان نوں قائد اعظم تے اقبال دا پاکستان بنان دا عزم رکھدے آں۔ اسیں اج ہندوستان دے کئی شعبیاں توں ودھ ترقی اُتے آں۔ اوہناں نے آکھیا کہ پنجاب وچ غریباں دا علاج مفت ہو رہیااے۔ کڈنی اینڈ لیور انسٹی ٹیوٹ وچ دو روگیاں دا مفت ٹرانسپلانٹ کیتا گیا۔ 70توں ودھ ڈاکٹراں نوں یورپ تے مشرق وسطی توں واپس لے کے آئے آں۔
