راولپنڈی( پاکستان پوائنٹ نیوز29۔مئی2018ء ) پاک بھارت ڈی جی ایم اوز نے اتفاق کیتا اے کہ 2003دے سیز فائر سمجھوتے اُتے پوری طرحاں عمل کیتا جائے گا، سارے مسائل ہاٹ لائن رابطیاں راہیں حل کیتے جان گے، ہر ممکن تحمل دا وکھالا تے بارڈر فلیگ میٹنگز کیتیاں جان گیاں، سرحد نال وسدے شہریاں نوں اوکڑاں توں بچان لئی اقدامات کیتے جان گے۔ آئی ایس پی آر مطابق پاک بھارت ڈی جی ایم اوز دا ہائٹ لائن اُتے رابطہ ہویا اے۔
رابطے دوران لائن آف کنٹرول تے ورکنگ باؤنڈری دی موجودہ صورتحال دا جائزہ لیا گیا۔ ایس موقعے تے دوویں پاسیوں مسائل ہاٹ لائن رابطیاں راہیں حل کرن اُتے اتفاق کیتا گیا۔ پاک بھارت ڈی جی ایم اوز نے ایس گل اُتے اتفاق کیتا کہ کسے وی مسئلے نوں بارڈر فلیگ میٹنگز راہیں حل کرن کوشش کیتی جائے گی۔ ایس دوران ایس گل اُتے وی اتفاق کیتا گیا کہ کسے وی مسئلے اُتے ہاٹ لائن رابطیاں دے نظام نوں استعمال کر کے حل کڈھیا جائے گا۔ پاک بھارت ڈی جی ایم اوز نے ایل او سی تے ورکنگ باؤنڈری دی موجودہ صورتحال دا جائزہ لین بارے اتفاق کیتا کہ 2003دے سیز فائر سمجھوتے اُتے عمل درآمد کیتا جائے گا ۔
