اسلام آباد( پاکستان پوائنٹ نیوز29۔مئی2018ء ) بھارت تے افغانستان نے فاٹا و گلگت بلتستان وچ نواں کھیڈ کھیڈن دی منصوبہ بندی کر لی اے۔ قومی اخبار وچ چھپن والی اک رپورٹ مطابق بھارت گلگت بلتستان تے افغانستان دے کُجھ علاقیاں نوں اہم سمجھدا اے۔ وسیلیاں نے دسیا کہ واشنگٹن وچ بھارتی و افغان سفارتکار رلکے پاکستان خلاف مہم شروع کرن والے نیں۔ دوویں ملک گلگت بلتستان تے فاٹا وچ انسانی حقاں دیاں خلاف ورزیاں نوں لُکان لئی کُجھ پاکستانیاں نال ای رلکے جھیڑوے علاقیاں نوں آئینی شکل دین دی کوشش کر رہے نیں۔
بھارتی و افغان سفارتکاراں دے موقف نوں ودھوتری دین لئی اندرلے خانے اک پاکستانی گروپ وی سرگرم اے۔ اک تحقیقاتی ادارے دے ماہر تاجیند رنجیر دا کہنا اے کہ پاکستان وچ ہون والے الیکشن نوں نقصان اپڑان لئی بھارت تے افغانستان کُجھ وی کر سکدے نیں۔ ایہناں دوویں ملکاں نوں پاکستان دیاں کُجھ سیاسی و مذہبی جماعتاں دیاں ہمدردیاں وی حاصل نیں تے ایہو وجہ اے کہ ایہناں جماعتاں نے فاٹا بل دی کُھل کے مخالفت کیتی۔
رپورٹ وچ دسیا گیا کہ پروفیسر حامد خان دا کہنا اے کہ 2019وچ بھارت وچ وی لوک سبھا دے الیکشن ہون والے نیں۔ بھارتی وزیر اعظم نریندر مودی افغانستان دی بھوئیں(زمین) استعمال کر کے پاکستانی الیکشن وچ اپنی مرضی دی سیاسی جماعت نوں فائدہ اپڑان لئی خطرناک منصوبے بنا سکدے نیں۔ ایس لئی سکیورٹی فورسز نوں چاہیدا کہ اوہ سرحدی معاملات نوں بہتر بنان لئی بہتر کم شروع کر دین۔ وسیلیاں نے ایہ وی انکشاف کیتا اے کہ ایس ویلے بھارت تے افغانستان وچ اسرائیلی کمانڈوز دی اک وڈی گنتی موجود اے جو پاکستانی فورسز لئی اک وڈا چیلنج بن کے ساہمنے آ سکدی اے۔
