لاہور( پاکستان پوائنٹ نیوز28۔مئی2018ء ) ارباں رُپئے لے کے امریکا نوں اسامہ بن لادن تیکر اپڑان والے فوجی افسر بارے معلومات ساہمنے آ گئیاں۔ تفصیل مطابق سابق آئی ایس آئی چیف اسد درانی دے انکشاف مگروں ہن مشہور پرچا کار اسد کھرل نے ارباں رُپئے لے کے امریکا نوں اسامہ بن لادن تیکر اپڑان والے فوجی افسر دیاں معلومات دے دتیاں نیں۔ اسد کھرل ولوں دعوا کیتا گیا اے کہ آئی ایس آئی دے سابق کرنل اقبال نے پنج ارب رُپئے لے کے امریکی کمانڈوز نوں ایبٹ آباد وچ اسامہ بن لادن دے کمپاؤنڈ تیکر اپڑیا۔
کرنل (ر) اقبال آپ امریکا وچ مقیم اے جدکہ اوہناں دا پُتر میجر شہریار سابق صدر پرویز مشرف نال رلکے دبئی وچ پرائیویٹ ہسپتال چلا رہیا اے۔ آئی ایس آئی دے سابق چیف اسد درانی نے ’را‘دے سابق سربراہ نال رلکے لکھی گئی کتاب وچ اک تھاں اُتے اسامہ بن لادن دی ایبٹ آباد آپریشن دوران موت وچ ڈاکٹر شکیل آفریدی تے سابق آرمی چیف جنرل اشفاق پرویز کیانی دے کردار بارے چانن پایا اے۔
اسد درانی نے ایبٹ آباد وچ آئی ایس آئی دے اک سابق افسر دے کردار دا ذکر کردے ہوئے آکھیا کہ اوہ بندہ پاکستان وچ نہیں رہندا۔ اسد دورانی نے افسر دا ناں لین توں انکار کردے ہوئے آکھیا کہ میں اوہنوں بغیر وجہ دے مشہور نہیں کرنا چاہندا۔ جنرل اسد دورانی ولوں ایبٹ آباد وچ آپریشن دوران پاکستانی فوجی افسردے کردار بارے انکشاف اُتے مشہور پرچا کار اسد کھرل نے اپنے اک ٹویٹ وچ اوس بندے بارے معلومات شیئر کر دتیاں۔پر بعدوں اسد کھرل نے اپنا ایہ ٹویٹ ڈیلیٹ وی کر دتا۔ اسد کھرل نے اپنے ٹویٹ وچ دعوا کیتا کہ آئی ایس آئی دے کرنل اقبال نے 50ملین ڈالرز یعنی 5ارب رُپئے پاکستانی لے کے امریکی فوج نوں ایبٹ آباد وچ اسامہ بن لان دے کمپاؤنڈ تیکر اپڑایا۔
