اسلام آباد( پاکستان پوائنٹ نیوز26۔مئی2018ء ) بھارتی خفیہ ایجنسی دے سابق سربراہ اے ایس دولت نے انکشاف کیتا اے کہ ’را‘ نے جنرل (ر) پرویز مشرف دی جان بچائی سی۔ اوہناں نے آکھیا کہ جان بچان اُتے پرویز مشرف تے اوس ویلے دے آئی ایس آئی چیف نے ’را‘ دا شکریہ ادا کیتا سی۔ قومی اخبار وچ چھپن والی اک رپورٹ مطابق بھارتی خفیہ ایجنسی ’را‘ دے سابق سربراہ اے ایس دولت نے انکشاف کیتا اے کہ سابق پاکستانی صدر جنرل (ر) پرویز مشرف دی زندگی اک وار ’را‘ نے بچائی۔
اوہناں دی زندگی ’را‘ نے ایہ اطلاع دے کے بچائی سی کہ جیش محمد اوہناں اُتے حملا کرن والی اے تے ’را‘ ولوں ایہ اطلاع ملن اُتے پاکستانی اداریاں نے ایس حملے نوں روک لیا۔ رپورٹ وچ دسیا گیا کہ بھارتی خفیہ ایجنسی ’را‘ دے سابق سربراہ اے ایس دولت نے بھارتی نجی ٹی وی چینل دیاں 2سوانی اینکراں برکھادت تے شیلا بھٹ نوں وکھ وکھ تفصیلی انٹرویو دیندے ہوئے دسیا کہ جنرل پرویز مشرف تے اوس ویلے دے آئی ایس آئی دے سربراہ نے مشرف دی جان بچان اُتے ’را‘ دا شکریہ ادا کیتا سی۔
چیتے رہوے کہ اے ایس دولت نے آئی ایس آئی دے سابق سربراہ ریٹائرڈ لیفٹیننٹ جنرل اسد درانی نال رلکے ’سپائی کرانیکل ‘نامی کتاب لکھی اے جیہنے دوویں ملکاں وچ طوفان کھڑا کر دتا اے۔پچھلی رات پاک فوج دے شعبہ تعلقات عامہ (آئی ایس پی آر) ولوں جاری بیان وچ آکھیا گیاکہ سابق سربراہ آئی ایس آئی لیفٹیننٹ (ر) جنرل اسد درانی نوں بھارتی خفیہ ادارے ’را‘ دے سربراہ نال رلکے لکھی گئی کتاب وچ دتے گئے اپنے موقف اُتے وضاحت لئی 28مئی نوں جنرل ہیڈ کوارٹر سدیا گیا اے۔
ڈی جی آئی ایس پی آر نے دسیا کہ اوہناں نوں ’سپائی کرانیکل‘ اُتے لیفٹیننٹ (ر) جنرل اسد درانی نال جُڑے خیالات اُتے وضاحت لئی سدیا گیا اے۔ اوہناں نے آکھیا کہ ملٹری کوڈ آف کنڈکٹ دی خلاف ورزی سارے حاضر تے (ر) فوجیاں اُتے لاگو ہوندی اے۔ ایس لئی اسد درانی نوں وی جواب طلبی لئی جی ایچ کیو سدیا گیا اے۔
