اٹک( پاکستان پوائنٹ نیوز25۔مئی2018ء ) اٹک وچ سابق وزیر اعظم نواز شریف دے جلسے وچ رلت نہ کرن اُتے واپڈا اہلکار نوں معطل کر دتا گیا۔ طارق محمود نے الزام لایا کہ مینوں جلسے وچ سرکاری طور اُتے رلت کرن دا آکھیا گیا سی۔ مینوں آکھیا گیا کہ افطاری تے خرچہ وی ملے گا۔ میں جلسے وچ رلت توں انکار کیتا ، جیہدے اُتے مینوں معطل کر دتا گیا۔ طار ق دا کہنا سی کہ ایکسیئن واپڈ ا نے ایس ڈی او دی رپورٹ اُتے کارروائی کیتی۔
طارق محمود نے آکھیا کہ میری معطلی غیر قانونی اے میرے کولوں کوئی جواب نہیں منگیا گیا۔ ایس ڈی او شیخ صفدر نے آکھیا کہ طارق محمود ڈرائیور اے، اوہنوں سٹاف نال ڈیوٹی کرن دا آکھیا گیا۔ طارق محمود نے روزے دا بہانہ بنا کے ڈیوٹی توں انکار کیتا سی۔ طارق محمود نوں پہلے وی کئی وار ارننگ دتی گئی اے۔ پچھلے دیہاڑے میں رپورٹ بنا کے ایکسیئن نوں گھل دتی۔
جیہدے اُتے اوہناں طارق محمود ڈرائیور نوں معطل کر دتا۔ ایتھے ایہ گل ذکر جوگ اے کہ ایس توں پہلاں وی مسلم لیگ (ن) دے جلسیاں وچ رلت نہ کرن اُتے کئی افسراں تے سرکاری ملازماں نوں جھاڑیا گیا اے۔ کُجھ دن پہلے ای نواز شریف دی بہاولنگرآمد اُتے ڈپٹی کمشنر اظہر حیات نے صاف آکھیا سی کہ ایہ نواز شریف دا نجی دورہ اے، نواز شریف دا نااہلی مگروں سٹیٹ افسر نال کوئی تعلق نہیں۔ ایس لئی اوہناں دی آمد تے استقبال وچ میرا کوئی کردار نہیں ہوئے گا نہ میں اوہناں نوں ریسیو کراں گا۔ایہدے مگروں ذکر کیتے گئے ڈپٹی کمشنر نوں دھمکیاں ملنیاں شروع ہو گیاں۔
