اسلام آ باد( پاکستان پوائنٹ نیوز24۔مئی2018ء ) صدر مملکت دی تنخاہ وچ 7لکھ 66ہزار 5سو رُپئے وادھا کیتا گیا اے۔ میڈیا رپورٹ مطابق وزیراعظم شاہد خاقان عباسی دی ہدایت اُتے کابینہ نے صدر مملکت ممنون حسین دی تنخاہ وچ 7لکھ 66ہزار 5سو رُپئے دے وادھے دا ترمیمی بل تیار کر لیا۔ بل دی منظوری مگروں صدر ممنون حسین دی تنخاہ 8لکھ 46ہزار 5سو رُپئے ہو جائے گی۔
کابینہ نوں وزیر اعظم شاہد خاقان عباسی نے ای صدر مملکت دی تنخاہ وچ وادھے دی سمری تیار کرن دی ہدایت کیتی سی جو کابینہ ڈویژن نے تیار کر لی ۔ سمری وچ آکھیا گیا اے کہ صدر دی تنخاہ وچ وادھا 75ایکٹ وچ ترمیم مگروں بل تیار کر کے وفاقی کابینہ دے بل وچ ترمیم دی منظوری دے بعد کیتا گیا۔ جیہدے تحت صدر مملکت دی تنخاہ وچ 7لکھ 66ہزار 5سو رُپئے وادھا کر دتا گیا اے۔
جدکہ آخری وار 2004وچ صدر دی تنخاہ وفاقی حکومت نے 80ہزار رُپئے کیتی سی پر ہن وادھے مگروں ممنون حسین دی تنخاہ 8لکھ 46ہزار 5سو رُپئے ہو جائے گی۔ صدر مملکت دی تنخاہ چیف جسٹس دی تنخاہ توں اک رُپیہ ودھ اے۔ چیتے رہوے کہ صدر مملکت دی تنخاہ ایس ویلے ملک دے کسے وی سرکاری سربراہ دے مقابلے وچ سبھ توں ودھ اے۔ ہور ایہ کہ صدر مملکت ممنون حسین دی تنخاہ روس، چین تے بنگلا دیش دے سربراہواں توں وی ودھ ہو جائے گی۔
آنکڑیاں (اعداد و شمار) مطابق ایس ویلے صدر مملکت ممنون حسین نوں سالہوار(سالانہ) تنخاہ 1کروڑ 92لکھ مل رہی اے۔ جیہدے تحت اوہناں دی مہینہ وار تنخاہ 16لکھ رُپئے بندی اے۔ چین دے صدر ژی چنگ پن نوں سالہوار صرف 21لکھ 65ہزار رُپئے ملدے نیں۔ روس دے صدر ولادی میر پیوٹن دی سالہوار تنخاہ اک کروڑ 59لکھ 19ہزار 547رُپئے اے۔ ایسے طرحاں بنگلا دیشی وزیر اعظم حسینہ واجد دی سالہوار تنخاہ صدر پاکستان دی مہینہ وار تنخاہ توں صرف ڈیڈھ لکھ رُپئے ودھ اے۔ ترکی دے صدر طیب اردگان دی سالہوار تنخاہ ممنون حسین توں صرف ساڈھے چھ لکھ رُپئے ودھ اے۔
