اسلام آباد‘ فیصل آباد (پاکستان پوائنٹ نیوز۔26ستمبر 2016) چیئرمین تحریک انصاف عمران خان نے کہیا اے کہ پاکستان دی لوکائی غربت تے تباہی دی وجھا جان چُکی اے‘ 30 ستمبر نُوں پتا لگ جاوے گا کِنی لوکائی نکلے گی‘ حکومت نے رکاوٹ پان دی کوشش کیتی تے ردِ عمل برداشت نہیں کر سکن گے۔ بنی گالا وچ صحافیاں نال گلبات کردیاں ہویاں چیئرمین تحریک انصاف عمران خان نے کہیا کہ پاناما لیکس اُتے ساریاں جماعتاں متحد نیں‘ رائیونڈ مارچ دے راہ وچ رکاوٹاں پائیاں گئیاں تے حکومت ردِ عمل برداشت نہیں کر سکے گی۔
پاکستان دا آئین پرامن احتجاج دا احق دیندا اے تے اسیں آئین وچ رہندیاں ہویاں ہر طرحاں دا احتجاج کراں گے۔ اوہناں نے کہیا کہ جِنی بُہتی کرپشن ہووے گی اونی ای غربت ودھے گی‘ پاکستان دا مزدور تے کسان مِدھیا جا رہیا اے۔ سانوں پاناما لیکس اُتے حق نہ مِلیا تے حکمران ردِ عمل برداشت نہیں کر سکن گے۔ اِک سوال اُتے اوہناں نے کہیا کہ جسٹس وجیہہ الدین دا احترام کردے نیں پر اوہناں نُوں اپنی نویں پارٹی بنان دا حق اے‘ مری اوہناں لئی دُعا اے کہ اللہ اوہناں نُوں کامیاب کرے۔
اودھر وزیر قانون پنجاب رانا ثناء اللہ نے تحریک انصاف دے رائیونڈ مارچ نُوں فول پروف سیکیورٹی فراہم کرن دا اعلان کردیاں ہویاں کہیا کہ پنجاب بھر توں جہڑا وی رائیونڈ جانا چاہوے اوہنوں پہنچاواں گے۔ کِسے کول کرایا نہ ہویا تے کرایا تے سواری دین نُوں وی تیار آں ۔ا وہناں نے کہیا کہ عمران خان کلے ای چلے سن کلے ای رہ جان گے۔
