اسلام آباد( پاکستان پوائنٹ نیوز23۔مئی2018ء ) سابق وزیر اعظم نواز شریف نے اج احتساب عدالت وچ ایون فیلڈ ریفرنس وچ لگاتار تیجے دن اپنا بیان ریکارڈ کرواندے ہوئے آکھیا کہ 2014دے دھرنے کروائے گئے۔ 2014دے دھرنیاں دا مقصد میرے اُتے دباء پانا سی۔ سابق وزیر اعظم نواز شریف نے آکھیا کہ دھرنے وچ آکھیا گیا کہ امپائر دی اُنگل اُتانہ ہون والی اے، کون سی اوہ امپائر؟دھرنیاں توں دو مہینے پہلاں عمران خان نال بنی گالا وچ ملاقات ہوئی تے عمران خان نے دھرنا دین دا کوئی اشارہ نہ دتا۔
فیر عمران خان تے طاہر القادری دی ملاقات ہوئی۔ مشرف کیس چلدا رہیا تے دھرنا دے دتا گیا۔ پر ایہناں دھرنیاں پچھے کون اے؟ ایہ گل پورا ملک جاندا اے۔ اوہناں نے آکھیا کہ اک خفیہ ادارے دے سربراہ دا پیغام گھلیا گیا کہ مستعفی ہوجاؤ یاں لمی چھٹی تے چلے جاؤ۔ کاش تُسیں لیاقت علی خان تے ذوالفقار علی بھٹو دی روح توں پُچھ سکدے او کہ تہاڈے نال کیہ ہویا؟میں پاکستان داپُتر آں مینوں پاکستان دے ذرے ذرے نال پیار اے۔
میں کسے توں حب الوطنی داسرٹیفیکیٹ لینا اپنی توہین سمجھنا واں۔عدالت وچ سابق وزیر اعظم نواز شریف نے ہور آکھیا کہ مینوں نااہل کرن تے پارٹی صدا ر ت توں ہٹان دی وجہ قوم آ پ جاندی اے۔ سیاسی مبصرین مطابق سابق وزیراعظم نواز شریف دے ایس بیان نوں سابق ترجمان پاک فوج لیفٹیننٹ جنرل عاصم سلیم باجوہ 4ورھے پہلاں ای رد کر چکے نیں۔استعفادیو یاں لمی چُھٹی دے چلے جاؤ دے نواز شریف دے دعوے نوں 2004 وچ جنرل عاصم باجوہ نے اپنے ٹویٹ راہیں رد کیتا سی۔
