اسلام آباد(پاکستان پوائنٹ نیوز16۔مئی2018ء ) ملک بھر وچ بجلی دے وڈے بریک ڈاؤن نے سبھ نوں پریشان کردتا۔ بجلی دے بریک ڈاؤن دیاں تحقیقات لئی ایڈیشنل سیکرٹری پاور ڈویژن وسیم مختار دی سربراہی وچ 4رکنی کمیٹی بنا دتی گئی اے۔ حکومت مطابق فنی خرابی دی وجہ توں بجلی بند ہوئی جدکہ وسیلیاں مطابق ایندھن دی کمی پاروں بجلی دا بریک ڈاؤن ہویا۔ تفصیل مطابق روزیاں توں صرف اک دن پہلاں ای نیشنل گرڈ وچ فنی خرابی دی وجہ توں پنجاب تے خیبرپختونخوا دے کئی علاقے بجلی توں محروم ہو گئے۔
حکومت مطابق تربیلا تے منگلا سنے کئی پاور پلانٹس وچ فنی خرابی پاروں ملک بھر وچ بجلی دا وڈا بریک ڈاؤن ہو یا۔ بجلی دے بریک ڈاؤن نال وفاقی راجدھانی اسلام آباد، پنجاب خیبرپختونخوا تے آزاد کشمیر دے کئی علاقیاں وچ بجلی دی فراہمی معطل ہوگئی۔ ایس حوالے نال ترجمان پاور ڈویژن نے ایہ دعوا کیتا کہ بجلی دے بریک ڈاؤن نال سندھ تے بلوچستان دے علاقے متاثر نہیں ہوئے پر پاور پلانٹس وچ خرابی دی وجہ توں ہور علاقیاں وچ بجلی دی فراہمی متاثر اے۔
ترجمان مطابق پاور پلانٹس وچ خرابی نال چار ہزار میگا واٹ بجلی دی فراہمی متاثر ہوئی۔ ترجمان نے دعوا کیتا کہ تربیلا، منگلا تے ہور پلانٹس توں بجلی بحال کر دتی گئی اے ۔ پاور ڈویژن دے ترجمان مطابق ملک بھر وچ بجلی دی مجموعی پیداوار 12ہزار میگا واٹ تیکر اپڑ گئی اے تے ایس ویلے سیکرٹری پاور ڈویژن تے ہور بجلی دی فراہمی دی نگرانی کر رہے نیں۔ دوجے پاسے بجلی دے بریک ڈاؤن دیاں تحقیقات لئی ایڈیشنل سیکرٹری پاور ڈویژن وسیم مختار دی سربراہی وچ 4رکنی کمیٹی بنا دتی گئی اے۔ حکومت مطابق فنی خرابی دی وجہ توں بجلی بند ہوئی جدکہ وسیلیاں دا کہنا اے کہ ایندھن دی کمی پاروں بجلی دا بریک ڈاؤن ہویا۔
