لاہور(پاکستان پوائنٹ نیوز24۔اپریل2018ء) مشہور گلوکارہ دا اپنا بھرا اوہنوں تے 2دھیاں نوں زیادتی دا نشانہ بناندا رہیا۔ قومی اخبار دی رپورٹ مطابق مشہور پشتو گلوکارہ نازیہ اقبال دا حقیقی بھرا نازیہ اقبال دیاں دو دھیاں نوں کئی چِر تیکر زیادتی دا نشانہ بناندا رہیا۔ پولیس مطابق گلوکارہ نازیہ اقبال اپنے کم دی وجہ توں رُجھی رہندی جدکہ گلوکارہ دا گھر والا باہرلے ملک ہوندا اے۔
ایس لئی گلوکارہ نے اپنیاں دوویں دھیاں نوں اپنے بھرا حوالے کیتا ہویا سی۔ جو اپنیاں دوویں بھانجیاں نوں لگاتار زیادتی دا نشانہ بناندا رہیا۔ حقیقی بھرا ہون دی وجہ توں گلوکارہ نوں کدی وی اپنے بھرا اُتے شک نہیں ہویا پر اک دن گلوکارہ نے آپ اپنے بھرا نوں رنگے ہتھوں پھڑ لیا۔ گلوکارہ نے ملزم خلاف درخاست دائر کردے ہوئے آکھیا کہ اوہدا بھرا افتخار اوہدی 12تے 8ورھیاں دی دھی نال زیادتی کردا رہیا۔ ملزم افتخار دوویں بالاں نوں قتل کر دین والی ویڈیو وکھا کے دھمکاندا سی کہ جے کسے نوں دسیا تے تہانوں وی اِنج ای قتل کر دیواں گا۔ پولیس نے ملزم نوں گرفتار کر کے بالڑیاں دا میڈیکل وی کروا لیا اے ،جیہنوں لیبارٹری ٹیسٹ لئی پنجاب فرانزک لیب گھل دتا گیا اے۔
