اسلام آباد(پاکستان پوائنٹ نیوز14۔اپریل2018ء) آؤندے الیکشن وچ چودھری نثار علی خان نوں ٹکٹ دین یاں نہ دین بارے مریم نواز دے بیان اُتے چودھری نثار علی خان دا ردعمل وی ساہمنے آ گیا اے۔ میڈیا رپورٹس مطابق چودھری نثار علی خان نے آکھیا کہ اوہناں توں ٹکٹ منگیا کیہنے اے؟کُجھ دناں مگروں ٹکٹ دین یاں نہ دین بارے بیان آ جاندا اے ۔ انج لگدا اے کہ آؤندے الیکشن وچ سبھ توں وڈا مسئلا مینوں ٹکٹ دینا یاں نہ دینا ای اے۔
اوہناں دا کہنا سی کہ35ورھیاں دی سیاسی زندگی وچ میں نہ پہلے کدی ٹکٹ دی درخاست کیتی نہ آؤندے ویلے کراں گا۔ میں کسے دے ٹکٹ دا طلبگار نہیں بلکہ میری طاقت اللہ دا ایمان تے حلقے دے لوکاں دا اعتماد اے۔ 1985توں لوکائی دا اعتماد میرے نال اے تے مینوں آس اے کہ آؤندے ویلے وی رہوے گا۔ چودھری نثار علی خان دا کہناسی کہ رب میرے اُتے اجیہا ویلا نہ لیائے کہ میں کسے دے ٹکٹ دا متھاج رہواں۔
