بنی گالا وچ موجود عمران خان دا گھر غیر قانونی قرار

اسلام آباد(پاکستان پوائنٹ نیوز28۔فروری2018ء) سپریم کورٹ وچ پی ٹی آئی چیئرمین عمران خان دے بنی گالا وچ موجود گھر دی اُساری بارے کیس دی سنوائی ہوئی۔ سنوائی دوران اج اسلام آباد انتظامیہ نے عمران خان دے گھر دی اُساری دا این او سی جاری کرن دی تردید کیتی۔ متعلقہ یو سی بہارہ کہو دے سابق یو سی سیکرٹری دا تحریری بیان اج سپریم کورٹ وچ جمع کروایاگیا۔ بیان وچ سابق سیکرٹری یوسی نے آکھیا کہ عمران خان نوں بنی گالا وچ گھر بنان لئی کوئی این او سی نہیں دتا گیا۔ عمران خان ولوں گھر بنان توں پہلاں کوئی وی نقشہ جمع نہیں کروایا گیا سی۔ چیتے رہوے کہ سپریم کورٹ وچ پچھلی سنوائی دوران عمران خان نے بنی گالا وچ گھر بنان دا این او سی جمع کروایا سی۔