لاہور(پاکستان پوائنٹ نیوز23۔فروری2018ء) تحریک انصاف نے سیکرٹریٹ وچ تالا توڑ احتجاج دا اعلان کر دتا، پی ٹی آئی پنجاب نے بیوروکریسی دی ہڑتال نوں مُکھ رکھدے ہوئے سیکرٹریٹ دے تالے توڑن لئی مارچ شروع کر دتا اے۔ میڈیا رپورٹس مطابق سابق ڈی جی ایل ڈی اے احد چیمہ دے حق وچ بیورو کریٹس میدان وچ آگئے نیں، افسراں نے اج سیکرٹریٹ وچ احتجاج کیتا اے۔ پچھلے دیہاڑے وزیر اعلا پنجاب شہباز شریف نوں ڈی ایم جی گروپ نے نیب دیاں کارروائیاں اُتے تحفظات دے حوالے نال قرار داد پیش کیتی۔
قرارداد وچ آکھیا گیا کہ نیب ولوں احمد چیمہ دی گرفتاری غیر آئین اے، سرکاری ملازماں دی انا مجروح نہ کیتی جائے۔ ملاقات کرن والے افسراں وچ چیف سیکرٹری پنجاب، ایڈیشنل سیکرٹری، آئی جی پنجاب پولیس، سیکرٹری داخلا سنے ہور شامل سن۔ ملاقات وچ وزیر قانون پنجاب رانا ثناء اللہ وی موجود سن۔ ایس موقعے تے سیکرٹریز تے کمشنرز نے پنجاب سیکرٹریٹ ولوں سانجھی قرار اد وزیر اعلا پنجاب نوں پیش کیتی۔ بیوروکریسی دے ایس رویے اُتے تحریک انصاف میدان وچ آگئی اے۔ پی ٹی آئی نے اج پنجاب اسمبلی وچ وی احتجاج کیتا تے ہن سیکرٹریٹ پنجاب ول مارچ شروع کر دتا اے۔ جتھے پی ٹی آئی پنجاب دے ارکان اسمبلی اپوزیشن لیڈر میاں محمود الرشید دی قیادت وچ تالا توڑ احتجاج کرن گے۔
