دبئی(پاکستان پوائنٹ نیوز20۔فروری2018ء) آل پاکستان مسلم لیگ دے سربراہ و سابق صدر جنرل (ر) پرویز مشرف نے (ن) لیگ دے نامزد وزیر اعظم شہباز شریف دی حمایت کر دتی اے۔ اوہناں نے آکھیاکہ شہباز شریف، نواز شریف توں بہتر وزیر اعظم ثابت ہو سکدے نیں، خاہش اے کہ نویں انتخابات نہ ہون، چالو صورتحال دی وجہ توں نویں الیکشن وچ لوکائی دا نقصان ای ہوئے گا۔ اوہناں نے نجی ٹی وی چینل نوں انٹرویو دیندے ہوئے آکھیا کہ مریم نواز نوں اوہناں دی پارٹی دے سیاستدان تسلیم نہیں کرن گے۔
شہباز شریف، نواز شریف توں بہتر وزیر اعظم ثابت ہون گے۔ پرویز مشرف نے ایم کیو ایم پاکستان دے تنظیمی بحران دے حوالے نال آکھیا کہ فاروق ستار سنے ایم کیو ایم دے کسے دھڑے وچ قائدانہ صلاحتاں نہیں۔ میرا ویژن وڈا اے پر ایم کیو ایم ایہدے وچ فٹ نہیں ہوندی۔ اوہناں نے آکھیا کہ ایم کیو ایم نوں مہاجراں دا ترجمان سمجھنا سطحی سوچ اے۔ ایم کیو ایم دے رہنما تے مزے کردے نیں پر لوکائی مصیبتاں وچ مبتلا اے۔
مہاجر اں تے ہور قوماں نوں آپس وچ لڑوایا جاندا اے۔ کراچی وچ نویں الیکشن وچ دھڑے بندے دی وجہ توں اتحادی سیاست ہوئے گی۔ سابق صدر نے آکھیا کہ پاکستان تحریک انصاف دے چیئرمین عمران خان وچ وی وژن نہیں اے پر اوہناں دی شخصیت پرکشش اے۔ میں حقیقی لیڈر شپ اُتے یقین رکھد آں جو نویں آئیڈیاز نال آئے۔ ایس موقعے تے پرویز مشرف نے ملکی صورتحال اُتے ہرکھ دا وکھالا کردے ہوئے آکھیا کہ اوہناں دی خاہش اے کہ الیکشن نہ ہوئے۔کیونکہ چالو صورتحال دی وجہ توں نویں الیکشن وچ لوکائی دا نقصان ای ہوئے گا۔
