پاکستان وچ بھارتی فلماں دی نمائش خلاف دائر درخاست اُتے وفاقی حکومت تے سنسر بورڈ نوں نوٹس جاری

لاہور(پاکستان پوائنٹ نیوز08۔ستمبر2016ء) لاہور ہائی کورٹ نے پاکستانی سینمیاں وچ بھارتی فلماں دی نمائش خلاف دائر درخاست اُتے وفاقی حکومت تے سنسر بورڈ نوں نوٹس جاری کردے ہوئے ہور سنوائی 27 ستمبر تیکر ملتوی کر دِتی۔ تفصیل دے مطابق جمعرات دے دیہاڑے لاہور ہائی کورٹ دے جسٹس شاہد کریم نے سٹیج اداکار افتخار ٹھاکر ولوں درخاست دی سنوائی کیتی۔ درخاست گزار دے وکیل دا ایس موقعے اُتے کہنا سی کہ بھارت مقبوضہ کشمیر وچ کشمیریاں اُتے ظلم کر رہیا اے تے پاکستان وچ بھارتی انڈسٹری نوں فروغ دِتا جا رہیا اے۔

حکومت ولوں کشمیریاں نال حمایت لئی دوغلی پالیسی اپنائی جا رہی اے تے پاکستان وچ بھارتی فلماں دی نمائش کشمیریاں دے زخماں اُتے لون لان دے برابر اے۔ درخاست گزار ولوں استدعا کیتی گئی کہ کشمیر دی آزادی تیکر بھارتی فلماں دی پاکستان وچ نمائش اُتے پابندی لائی جائے۔لاہور ہائی کورٹ نے درخاست گزار دا موقف سُندے ہوئے وفاقی حکومت تے سنسر بورڈ نوں نوٹس جاری کر دتے جد کہ بھارتی فلماں دی پاکستان وچ نمائش دے حوالے نال نوٹی فکیشن منگدے ہوئے سنوائی 27 ستمبر تیکر ملتوی کر دِتی۔