پشاور(پاکستان پوائنٹ نیوز17۔فروری2018ء) سینیٹ الیکشن دے سلسلے وچ خیبرپختونخوا اسمبلی اندر ہارس ٹریڈنگ روکن لئی تحریک انصاف تے (ن) لیگ وچکار خفیہ رابطیاں دا انکشاف ہویا اے۔ تفصیل مطابق آؤندے مہینے ہون والے سینیٹ الیکشن دے سلسلے وچ ساریاں سیاسی جماعتاں ولوں جوڑ توڑ جاری اے۔ ایس حوالے نال بلوچستان اسمبلی وچ اکثریت ہون مگروں (ن) لیگ ہتھوں حکومت نکلن دے بعد ہور صوبائی اسمبلیاں وچ ہارس ٹریڈنگ ہون دا خدشہ ودھ گیا اے۔
ایس سلسلے وچ تحریک انصاف تے (ن) لیگ دی قیادت دے پردے پچھے اک دوجے نال رابطے جاری نیں۔ وزیر اعلا خیبرپختونخوا پرویز خٹک تے گورنر اقبال ظفر جھگڑا وچکار رابطہ ہویا اے۔ ایس دوران دوویں رہنماواں وچکار خیبرپختونخوا اسمبلی وچ ہارس ٹریڈنگ روکن لئی اتفاق ہویا۔ دوویں جماعتاں وچ طے ہویا کہ اوہ اک دوجے دے ارکان اسمبلی نوں خریدن دی کوشش نہیں کرن گے جدکہ پیپلز پارٹی تے ہور جماعتاں ولوں ہارس ٹریڈنگ دی کوشش نوں ناکام وی بنان گے۔
