کراچی(پاکستان پوائنٹ نیوز17۔فروری2018ء) چیف جسٹس دے حکم اُتے پیپلز پارٹی دے رہنما شرجیل میمن نوں ہسپتال توں جیل منتقل کر دتا گیا اے۔ تفصیل مطابق چیف جسٹس ثاقب نثار نے سپریم کورٹ کراچی رجسٹری وچ شرجیل میمن نوں جیل توں ہسپتال منتقل کرن بارے نوٹس دی سنوائی کیتی۔ ایس موقعے تے آئی جی جیل خانہ جات نصرت منگن نے عدالت نوں دسیا کہ سندھ ہائی کورٹ نے ضمانت رد کیتی سی جہدے اُتے 24اکتوبر2017نوں شرجیل میمن نوں جیل گھلیا گیا تے فیر ڈاکٹراں دی سفارش اُتے اوہناں نوں ہسپتال منتقل کیتا گیا۔
چیف جسٹس نے آئی جی جیل خانہ جات توں پُچھیا کہ کیہ دو دن مگروں شرجیل نوں جیل ہسپتال منتقل کر دتا گیا؟آئی جی نصرت منگن نے جواب دتا کہ نیب کورٹ نے میڈیکل بورڈ بنان دی ہدایت دتی سی۔ ایس موقعے تے چیف جسٹس نے آکھیا کہ نیب کورٹ نے صرف ٹیسٹ کران دا آکھیا سی پر تہانوں کہنے ہسپتال گھلن دی اتھارٹی دتی تے کتھے لکھیا اے کہ ہسپتال منتقل کرو؟شرجیل میمن نوں کسے عدالت نے ہسپتال گھلن دا نہیں آکھیا تے ایہ اپنے ولوں بنائی گئی رپورٹس اے ایس لئی شرجیل میمن نوں اج ای جیل منتقل کیتا جائے۔
