اسلام آباد(پاکستان پوائنٹ نیوز14۔فروری2018ء) سپریم کورٹ نے اسٹیبلشمنٹ ڈویژن توں دوہری شہریت رکھن والے سرکاری افسراں بارے رپورٹ 25دناں وچ منگدے ہوئے سارے صوبائی چیف سیکرٹریاں توں وی دوہری شہریت رکھن والے افسراں دی لسٹ منگ لئی اے، عدالت عظمی نے آکھیا اے کہ حکم اُتے عمل نہ ہویا تے ذمے واراں خلاف ایکشن لواں گے۔ بدھ نوں چیف جسٹس پاکستان جسٹس ثاقب نثار دی سربراہی وچ سپریم کورٹ دے تن رکنی بنچ نے دوہری شہریت رکھن والے سرکاری افسراں بارے کیس دی سنوائی کیتی۔
سنوائی دوران سیکرٹری اسٹیبلشمنٹ ڈویژن پیش ہوئے تے عدالت نوں دسیا کہ سارے اداریاں توں عدالتی حکماں دیاں تفصیلاں منگوائیاں گئیاں، دو صوبیاں دی رپورٹ آ گئی اے، ہور اداریاں توں رپورٹس آنا باقی اے، ایس لئی حتمی رپورٹ لئی ہور ویلا دتا جائے۔ چیف جسٹس نے آکھیا کہ 43وزارتاں وچوں 20دی رپورٹ آئی اے۔ سرکاری لوک اپنے بالاں نوں باہر منتقل کر دیندے نیں، ایتھے گڑ بڑ کرن اُتے پھڑے جان تے باہر چلے جاندے نیں۔
چیف جسٹس نے ریمارکس وچ آکھیا کہ سرکاری افسراں نے دوہری شہریت دا حلف چُکیا ہویا ، اوہدی وفاداری کس نال ہوئے گی؟ چیف جسٹس نے آکھیا کہ پارلیمنٹرینز نوں دوہری شہریت اُتے نااہل کیتا گیا ۔ ساڈے کول مکمل معلومات ہونیاں چاہیدیاں۔ چیف جسٹس نے آکھیا کہ دوہری شہری رکھن والیاں دی خبر والے نوں ایوارڈ دیواں گے۔ اوہناں نے آکھیا کہ ایہ بعد وچ طے کراں گے کہ دوہری شہریت لُکان والیاں خلاف کیہ ایکشن ہوئے گا۔ کیس دی سنوائی پہلی مارچ تیکر ملتوی کر دتی گئی۔
