لاہور(پاکستان پوائنٹ نیوز13۔فروری2018ء) تحریک انصاف ہار گئی پر اوہدا نظریہ جِت گیا۔ تفصیل مطابق نجی ٹی وی چینل دے پروگرام وچ مشہور پرچاکار ضرار کھوڑو، وسعت اللہ خان تے مبشر زیدی پچھلے دیہاڑے لودھراں وچ ہون والے ضمنی الیکشن بارے گل بات کر رہے سن۔ پرچا کاراں نے لودھراں وچ ہون والے الیکشن وچ پاکستان تحریک انصاف دی ہار نوں حیران کن قرار دے دتا کیونکہ الیکشن توں پہلاں ایہ گل کیتی جا رہی سی کہ لودھراں دے ضمنی الیکشن وچ جِت پی ٹی آئی دی ہوئے گی تے ایس حلقے وچ ترین دی سیٹ بہت محفوظ وکھالی دے رہی سی پر (ن) لیگ دی جِت نے سبھ نوں حیران کر دتا۔
مشہور پرچاکار وسعت اللہ خان دا کہنا سی کہ عمران خان ہمیشہ خاندانی سیاست دے خلاف رہے نیں تے عمران خان نے ہمیشہ خاندانی سیاست دی زبردست مخالفت کیتی اے۔ جہدے اُتے ضرار کھوڑو دا کہنا سی کہ بے شک پاکستان تحریک انصاف نوں لودھراں وچ ہون والے ضمنی الیکشن وچ ہار دا ساہمنا کرنا پیا اے پر پاکستان تحریک انصاف دے نظریے دی جِت ہوئی اے تے لوکاں نے عمران خان دے ایس نظریے نوں ٹھیک قرار دتا اے کہ خاندانی سیاست نہیں ہونی چاہیدی۔ چیتے رہوے کہ پچھلے دیہاڑے لودھراں دے ضمنی الیکشن وچ مسلم لیگ (ن) دے امیدوار سید محمد اقبال شاہ نے تحریک انصاف دے امیدوار نوں ہرا دتا سی۔
