بھارت(پاکستان پوائنٹ نیوز08۔فروری2018ء) سوانیاں اُنج تے ہر شعبے وچ مرداں دے موڈھے نال موڈھا جوڑ کے کم کردیاں نظر آؤندیاں نیں تے تعلیم دے شعبے وچ وی سوانیاں کسے توں پچھانہ نہیں نیں۔ اجیہی ای اک مثال بھارت وچ اک کُڑی نے قائم کیتی۔ جو بال نوں جنم دین دے صرف چار گھنٹے مگروں پرچہ دین اپڑ گئی۔ بھارتی میڈیا دی اک رپورٹ مطابق بھارتی شہر بہار وچ بال دے جنم دے صرف چار گھنٹے پچھوں بابیتا کماری نامی کُڑی بال نوں گودی وچ لے کے امتحان دین اپڑ گئی۔
سکول دا عملا تے اُستاد کُڑی نوں ایس حال وچ ویکھ کے حیران رہ گئے۔ بابیتا لئی ایس حال وچ امتحان دینا بہت مشکل سی کیونکہ اوہ اجے پوری طرحاں صحت مند نہیں ہوئی سی۔ کُڑی دی تعلیم نال جُڑت ویکھ کے امتحانی مرکز دی انچارج نے بال نوں اوہدی دادی دے حوالے کیتا تے کُڑی نوں کلاس وچ بِہن لئی آکھیا تاں جے اوہ پیپر اُتے پوری طرحاں دھیان دے سکے۔ کُڑی پیپر دین دوران اپنے با ل نوں وی ویکھدی رہی۔
کُڑی دا اک سال پہلے ای ویاہ ہویا سی تے اوہ کسے طرحاں وی اپنا امتحان چھڈنا نہیں چاہندی سی۔ کُڑی دا شوہر وی امتحانی سینٹر دے باہر کھلوتا اپنی بیوی لئی فکر مند رہیا۔ بابیتا دے ہم جماعتاں نے نہ صرف اوہنوں مبارکباد دتی بلکہ اوہدے ایس فیصلے نوں ڈاڈھا سلاہیا۔ کُڑی دی تصویر سوشل میڈیا اُتے وائرل ہوگئی اے۔ سوشل میڈیا ورتیندڑاں ولوں کُڑی دی تعلیم نال محبت نوں سلاہیا جا رہیا اے۔
