لاہور(پاکستان پوائنٹ نیوز07۔فروری2018ء) مردان وچ نِکی بالڑی اسماء دے قاتلاں نوں کہنے گرفتار کیتا؟پی ٹی آئی تے پنجاب حکومت کریڈٹ لین لئی اگے اگے۔ تفصیل مطابق مردان وچ قتل ہون والی اسماء دے قاتلاں نوں میڈیا ساہمنے پیش کر دتا گیا۔ اج سویرے پریس کانفرنس کردے ہوئے آئی جی پولیس خیبرپختونخوا تے آر پی او مردان دا کہنا سی کہ ساڈے کول ملزم دی کوئی تصویر نہیں سی تے جس تھاں تے بالڑی نوں زیادتی دا نشانہ بنایا گیا اوتھے گنے دے پتر اُتے موجود خون دے قطرے توں اسیں ملزم تیکر اپڑے آں تے نِکی اسماء دا قاتل گرفتار کرن لئی اسیں دن رات اک کیتا۔
ایس توں وکھ تحریک انصاف دے چیئرمین عمران خان نے ٹویٹ کردے ہوئے کے پی کے پولیس نوں شاباش دتی تے آکھیا کہ ایس کیس وچ خون دے دھبے توں وکھ ہور کوئی ثبوت نہیں سی۔ پر کے پی کے پولیس نے پیش ورانہ انداز وچ ملزم نوں گرفتار کیتا۔دوجے پاسے رانا ثناء اللہ نے ایس حوالے نال پریس کانفرنس کردے ہوئے آکھیا کہ ملزم دی گرفتاری پنجاب فرانزک لیبارٹری دے تجزیے مگروں ہوئی۔
پر ہن ایہدا کریڈٹ آئی جی پولیس کے پی کے لے رہے نیں۔ اوہناں نے آکھیا کہ جے وزیر اعلا کے پی کے وچ اینی صلاحیت ہوندی تے اوہ ملزم نوں آپ گرفتار کرواندے۔ ایس لئی اوہناں نوں اپنی ناکامی اُتے شرم آنی چاہیدی۔ رانا ثناء اللہ نے ہور آکھیا کہ بالڑی دا قاتل اوہدا رشتے دار اے۔ پولیس کئی دناں تیکر ملزم دے گھر موجود رہی پر اوہنوں گرفتار نہیں کر سکی۔ رانا ثناء اللہ نے آکھیا کہ ملزم دی گرفتاری ڈی این اے رپورٹ ساہمنے آن مگروں ہوئی۔ اسماء دے قاتل تے گرفتار ہو گئے نیں پر ایہدا کریڈٹ لین لئی پی ٹی آئی تے پنجاب حکومت اگے اگے نیں۔ دوواں دا ایہ دعوا اے کہ اسماء دا قاتل اوہناں دی وجہ توں گرفتار ہویا۔
