راولپنڈی(پاکستان پوائنٹ نیوز07۔فروری2018ء) چیف آف آرمی سٹاف جنرل قمر جاوید باجوہ دی صدارت ہیٹھ کور کمانڈرز کانفرنس ہوئی، کانفرنس دوران ملک نوں پیش اندرونی تے بیرونی چیلنجاں دا جائزہ تے امریکی پالیسیاں نوں مُکھ رکھدے ہوئے سکیورٹی صورتحال بارے وچار وٹاندرا کیتا گیا۔ آئی ایس پی آر مطابق آرمی چیف جنرل قمر جاوید باجوہ دی صدارت وچ اج جی ایچ کیو راولپنڈی وچ کور کمانڈرز کانفرنس دا آہر کیتا گیا۔
کانفرنس وچ جیو سٹرٹیجک تے امریکی پالیسیاں نوں مُکھ رکھدے ہوئے سکیورٹی صورتحال بارے وچار وٹاندرا کیتا گیا۔ ایل او سی، ورکنگ باؤنڈری اُتے بھارتی فائرنگ تے آپریشن ’ردالفساد‘ دے تحت ہون والی پیشرفت دا جائزہ لیا گیا۔ کانفرنس دے رلتیاں نے ایس گل اُتے اتفاق کیتا کہ پاکستان و خطے وچ امن و امان دا قیام یقینی بنایا جائے گا۔ انسدا د دہشت گردی دیاں کوششاں وچ حاصل ہون والیاں کامیابیاں نوں مستحکم بنایا جائے گا۔ خطے وچ تعلقات دے قیام وچ قومی مفاد نوں نظر وچ رکھیا جائے گا۔ آرمی چیف جنرل قمر جاوید باجوہ نے آکھیا کہ ایل او سی تے ورکنگ باؤنڈری اُتے بھارت ولوں سیز فائر سمجھوتے دیاں خلاف ورزیاں خطے دے مفاد لئی خطرہ نیں۔ بھارت دی کسے وی مہم جوئی دا موثر جواب دتا جائے گا۔
