اسلام آباد(پاکستان پوائنٹ نیوز06۔فروری2018ء) محکمہ موسمیات دا کہنا اے کہ جمعے توں ملک دے مختلف علاقیاں وچ بارشاں تے برفباری دا نواں سلسلا شروع ہو جائے گا۔ محکمہ موسمیات نے پیشنگوئی کیتی اے کہ آؤندے جمعے توں ملک بھر وچ موسم دی تبدیلی دا امکان اے ۔ 9فروری توں 13فروری تیکر پاکستان دے مختلف علاقیاں وچ بارشاں تے برفباری ہو سکدی اے۔ محکمہ موسمیات مطابق 9فروری توں ہواواں دا سلسلا ملک دے مغربی علاقیاں وچ داخل ہو جائے گا جہدی وجہ توں بارشاں دی آس اے۔
پیر تے منگل نوں مری و گلیات وچ ڈاڈھی برفباری ہوئے گی۔ محکمہ موسمیات مطابق جمعے توں منگل تیکر بلوچستان دے کئی علاقیاں وچ بارش جدکہ کوئٹہ تے قلات ڈویژن وچ برفباری دی آس اے۔ محکمہ موسمیات دا کہنا اے کہ ایتوار توں منگل تیکر کوہاٹ، مردان تے مالاکنڈ ڈویژن وچ، پیر تے منگلا نوں گوجرانوالا، سرگودھا تے اسلام آباد وچ بارشاں، ایتوار توں بدھ تیکر کشمیر تے گلگت بلتستان وچ بارشاں تے پہاڑاں اُتے برفباری جدکہ مالاکنڈ تے ہزارہ ڈویژن دے پہاڑاں اُتے برفباری دی آس اے۔
