اسلام آباد(پاکستان پوائنٹ نیوز06۔فروری2018ء) نجی ٹی وی چینل دے پروگرام وچ گل بات کردے ہوئے جنرل (ر) امجد شعیب نے آکھیا کہ ملک وچ پرونوگرافی دا اک ریکٹ موجود اے جہدے وچ ایم این اے وسیم احمد دے ملوث ہون دیاں افواہواں نیں، اللہ جانے ایہ ٹھیک اے یاں نہیں۔ اوہناں بارے ایہ وی آکھیا جا ریا اے کہ اوہ ملکوں فرار ہو گئے نیں، ہن پتا نہیں ایہ خبراں ٹھیک نیں یاں نہیں پر جے ٹھیک نیں تے فیر ملزم عمران دا کردار تورائی دے برابر ہوئے گا۔
اوہناں دا کہنا سی کہ ہو سکدا اے کہ اوہنے بالڑی نوں بہلا کے اوتھوں تیکر اپڑایا ہوئے۔ ایہ وی ممکن اے کہ پولیس نے اوہنوں بیان یاد کروائے ہون۔ جنرل (ر) امجد شعیب نے آکھیا کہ باہرلے ملک اکاؤنٹس بارے وی خبراں آ رہیاں نیں پر عمران تے ان پڑھ بندہ اے۔ اوہ اکاؤنٹس آپریٹ نہیں کر سکدا، سو اوہدے ناں اُتے ضرور ایس طرحاں دے لوک موجود نیں جو بااثر نیں تے باہرلے ملکاں وچ ایس طرحاں دا کم کر رہے نیں۔
اوہناں دا کہنا سی کہ میں پنجاب حکومت اُتے اعتماد نہیں کر سکدا، مینوں ڈر اے کہ ایہ کیس ٹھپ کر دتا جائے گا یاں فیر مُنڈا مار دتا جائے گا کیونکہ ایہ کیس اوہی اے جو قصور وچ بالاں دے پورنوگرافی سکینڈل دی شکل وچ ساہمنے آیا سی جہنوں رانا ثناء اللہ نے زمین دا جھیڑا آکھ دتا سی۔ اوہناں داکہنا سی کہ جے اوس ویلے ریکٹ نوں پھڑ لیا جاندا تے اج قصور وچ ایہ صورتحال ویکھن نوں نہ ملدی۔
