قصور(پاکستان پوائنٹ نیوز06۔فروری2018ء) قصور وچ جنسی زیادتی دا نشانہ بنن مگروں قتل ہون والی نکی بالڑی زینب نے پوری قوم نوں دُکھی کر دتا ۔ اج وی زینب دا ناں سُندے ای اوہدا مُکھڑا لوکاں دیاں اکھاں ساہمنے آ جاندا اے۔ سوشل میڈیا اُتے زینب قتل کیس نوں بُہتی کوریج ملن اُتے ای چیف جسٹس نے وی زینب کیس دا آپ نوٹس لیا، جہدے مگروں زینب دا قاتل گرفتار ہویا۔
کُجھ دن پہلے ای اک سوشل میڈیا ورتیندڑ نے اپنی اک پوسٹ وچ لکھیا کہ مینوں زینب دی قبر اُتے جان دا اتفاق ہویا۔ اوہدی قبر گلابی رنگ دے پُھلاں نال سجی ہوئی سی۔ لگدا اے زینب امین نوں انب ای نہیں گلابی رنگ وی بہت پسند سی۔ زینب دی سوشل میڈیا اُتے وائرل ہوئی تصویر وچ وی اوہنے گلابی رنگ دی جیکٹ پائی ہوئی سی۔ فر اک توں لے کے جیکٹ تے ہن قبر اُتے گلاب۔
میں زندگی وچ پہلی وار شہد دیاں مکھیاں نوں ایس طرحاں کسے دی قبر اُتے چکر لاندے تے بیٹھیے ویکھیا سی۔ایہ منظرویکھ کے انج لگ رہیا سی جیویں شہد دیاں مکھیاں زینب نال لُکن میٹی کھیڈ رہیاں ہون۔ میں زینب دی قبر کول ای بِہ گیا تے میریاں اکھاں بھج گئیاں۔ شہد دیاں مکھیاں دیاں شرارتاں ویکھدے ای میں بھجیاں اکھراں مگروں وی ہسدا رہیا۔ مینوں انج لگیا جیویں میں زینب تے شہید دیاں مکھیاں دے کھیڈ دا ایمپائر آں۔
میرے قبر نیڑے بِہندے ای شہد دیاں مکھیاں میرے کن نیڑے آ کے پر مارن لگیاں۔ شاید آکھ رہیاں ہون کہ میں زینب دے حق وچ ڈنڈی ماری اے۔ ساریاں مکھیاں زینب دی قبر دوالے گھمدیاں رہیاں تے میں ایہ منظر ویکھدا رہیا۔ بھلا زینب نوں چھڈنا اینا آسان تھوڑی اے؟میں قبر نیڑے بیٹھا ایہ سبھ کُجھ ویکھ ای رہیا سی کہ فیر بابا شریف آگیا۔ بابا شریف (جو زینب دا رشتے دارنہیں) نے زینب دی قبر اُتے پانی لانا شروع کر دتا۔ایہ منظر ویکھ کے میریاں اکھاں وچوں اتھرو جاری ہوگئے۔
