اسلام آباد(پاکستان پوائنٹ نیوز02۔فروری2018ء) پچھلے دیہاڑے سپریم کورٹ وچ شاہ زیب قتل آپ نوٹس کیس دی سنوائی ہوئی۔ سنوائی دوران سپریم کورٹ نے کیس وچ دہشت گردی دیاں دفعات بحال تے سندھ ہائی کورٹ دا فیصلا کالعدم قرار دیندے ہوئے ملزم شاہ رخ جتوئی تے اوہدے ساتھیاں نوں گرفتار کرن دا حکم دے دتا۔ جہدے مگروں پولیس نے عدالت دے احاطے توں ای ملزم نوں اوہدے ساتھیاں سنے گرفتار کر لیا۔
سپریم کورٹ نے حکم دتا کہ ملزماں دا ناں وی ای سی ایل وچ پایا جائے۔ سنوائی دوران چیف جسٹس ثاقب نثار نے شاہ زیب قتل کیس دے مرکزی ملزم دے وکیل سردار لطیف کھوسہ توں پُچھیا کہ اوہ کہڑا ہینڈ سم نوجوان سی جہنے عدالت وچ پیشی دے موقعے تے وکٹری دا نشان بنایا سی؟ میں اوہنوں ویکھنا چاہنا واں۔اوسے ویلے مجرم نے اپنی سیٹ اُتے کھلو کے ہسدے ہوئے آکھیا جی میں آں اوہ تے اوہ میرا بچپنا سی۔ جہدے مگروں عدالت نے ملزم نوں بیٹھن دا حکم دتا۔ شاہ رخ جتوئی دے ہسدے ہوئے دتے گئے ایس جواب نے فرعونیت دی اک نویں مثال قائم کر دتی۔
