اسلام آباد(پاکستان پوائنٹ نیوز31۔جنوری2018ء) افغان صدراشرف غنی نے کابل وچ آپ مارو دھماکے وچ 125بندیاں دی موت مگروں پاکستانی وزیر اعظم شاہد خاقان عباسی دا فون سُنن توں انکار کر دتا اے۔ جہدے مگروں دوویں گوانڈھیاں وچکار تعلقات ہور خراب ہون دا ڈر اے۔ یاد رہوے کہ افغانستان نے پچھلے کُجھ ہفتیاں دوران دہشت گردی دیاں کارروائیاں دا الزام پاکستان اُتے لایا، جہنوں پاکستان نے رد کر دتا۔
وسیلیاں مطابق وزیر اعظم پاکستان شاہد خاقان عباسی نے افغان صدر اشرف غنی نال ہِرکھ لئی فون کیتا پر افغان صدر نے وزیراعظم دا فون سُنن توں انکار کر دتا۔ دوجے پاسے دفتر خارجا نے تحریک طالبان افغانستان تے حقانی نیٹ ورک نال تعلق رکھن والے 27شدت پسنداں نوں افغانستان دے حوالے کرن دا انکشاف کیتا اے۔دفتر خارجا دے ترجمان ڈاکٹر فیصل نے اپنے ٹویٹ وچ آکھیا سی کہ پاکستان تحریک طالبان افغانستان تے حقانی نیٹ ورک دے مشتبہ عناصر نوں افغانستان خلاف کسے وی دہشت گردی لئی پاکستانی بھوئیں ورتن توں روکن دی کوشش کر رہیا اے۔ ایس سلسلے وچ نومبر 2017وچ تحریک طالبان افغانستان تے حقانی نیٹ ورک نال تعلق دے شبے وچ 27بندیاں نوں افغانستان دے حوالے کیتا گیا۔