اسلام آباد(پاکستان پوائنٹ نیوز29۔جنوری2018ء) چیف جسٹس آف پاکستان جسٹس میاں ثاقب نثار نے مردان وچ نِکی بالڑی عاصمہ نال زیادتی تے قتل دے واقعے دا نوٹس لیند ے ہوئے خیبرپختونخوا پولیس دی کارکردگی نوں غیر تسلی بخش قرار دتا اے، کیس دی سنوائی منگل نوں متھدے ہوئے خیبرپختونخوا دے ایڈووکیٹ جنرل تے آئی جی پولیس نوں نوٹس جاری کر دتے۔ تفصیل مطابق 17جنوری نوں خیبرپختونخوا دے ضلع مردان وچ 4ورھیاں دی بالڑی عاصمہ نوں جنسی زیادتی دا نشانہ بنان مگروں قتل کردتا گیا سی۔
معصوم عاصمہ دا قاتل اجے تیکر گرفتار نہیں ہو سکیا، جہدی وجہ توں خیبرپختونخوا پولیس دی کارکردگی اُتے سوالیہ نشان لگ گیا اے۔ عاصمہ کیس وچ چیف جسٹس نے خیبرپختونخوا پولیس دی کارکردگی نوں غیر تسلی بخش قرار دیندے ہوئے مقدمے نوں کل سنوائی لئی متھن دا حکم دتا اے۔ عدالت نے خیبرپختونخوا دے ایڈووکیٹ جنرل تے آئی جی پولیس نوں نوٹس جاری کر دتا اے۔ منگل نوں کیس دی سنوائی چیف جسٹس دی سربراہی وچ تن رکنی بنچ کرے گا۔ ایس توں پہلاں چیف جسٹس نے خیبرپختونخوا پولیس توں واقعے دی تفتیشی رپورٹ منگی سی۔
