اسلام آباد(پاکستان پوائنٹ نیوز29۔جنوری2018ء) سپریم کورٹ آف پاکستان دے چیف جسٹس میاں ثاقب نثار نے میمو گیٹ کیس دی فائل منگدے ہوئے ریمارکس دتے کہ حسین حقانی ملک واپس آ کے میمو گیٹ کیس دا ساہمنا کرن۔ پیر نوں سپریم کورٹ وچ اوورسیز پاکستانیاں نوں ووٹ دا حق دین بارے کیس دی سنوائی ہوئی تے ایس سلسلے وچ چیئرمین نادرا عدالت وچ پیش ہوئے۔ چیئرمین نادرا نے عدالت نوں دسیا کہ الیکشن کمیشن نال اوورسیز پاکستانیاں دی ووٹنگ دا معاملا غور ہیٹھ اے، اپریل دے شروع تیکر سافٹ ویئر تیار کر لواں گے۔
تجرباتی بنیاداں اُتے فرضی الیکشن وچ ایس سہولت دا تجربہ کیتا جا سکدا اے۔ سنوائی دوران چیف جسٹس نے ریمارکس دتے کہ چیئرمین نادرا نے بڑی چنگی خبر دتی اے۔ اصل مقصد پر واسیاں نوں (تارکین وطن) ووٹ دی سہولت دینا اے۔ اوورسیز پاکستانی ایس سہولت وچ مالی حصہ پان لئی تیار نیں۔ ایس موقعے تے چیف جسٹس نے آکھیاکہ اک ایس طرحاں دا وی پاکستانی اے جو عدالت نال وعدہ کر کے واپس نہیں آیا ، اوہ کدھر اے،حسین حقانی کدھر اے؟ کیہ اوہناں نوں وی ووٹ پان دی سہولت ملے گی؟ کیوں نہ حسین حقانی نوں نوٹس دے کے سدیا جائے۔
چیف جسٹس نے ریمارکس وچ آکھیاکہ حسین حقانی ملک واپس آ کے میمو گیٹ دا ساہمنا کرن۔ چیف جسٹس نے سپریم کورٹ دے رجسٹرار آفس توں میمو گیٹ کیس دی فائل وی منگ لئی اے۔ چیتے رہوے کہ پیپلز پارٹی دے پچھلے دور وچ ایس ویلے امریکا وچ پاکستانی سفیر حسین حقانی دا اک مبینہ خط ساہمنے آیا سی۔ خط وچ حکومت نے حسین حقانی توں استعفا لیا سی جدکہ حسین حقانی اودوں دے باہرلے ملک نیں۔
