قصور(پاکستان پوائنٹ نیوز25۔جنوری2018ء) زینب دے قاتل دا پہلا ڈی این اے نمونہ مبینہ طور اُتے غائب کیتے جان دا انکشاف ہویا اے۔ تفصیل مطابق مشہور پرچا کار صابر شاکر ولوں نجی ٹی وی چینل دے پروگرام وچ گل بات کردے ہوئے زینب دے قاتل عمران دے حوالے نال انکشاف کیتا گیا اے۔ صابر شاکر نے انکشاف کیتا اے کہ زینب دے قاتل دا پہلا ڈی این اے نمونہ مبینہ طور اُتے غائب کر دتا گیا سی۔
ایہو وجہ اے کہ پہلے ٹیسٹ وچ عمران نوں کلیئر قرار دے دتا گیا۔صابر شاکر مطابق ایہ وی اطلاع اے کہ عمران دا ڈی این اے سیمپل جانکے بدل دتا گیا سی تاں جے اوہنوں بچایا جا سکے۔ پر مشکوک حرکتاں کارن قاتل اُتے پولیس دے کُجھ لوکاں نے اپنے طور اُتے نظر رکھی تے انج ملزم نوں مُڑ گرفتار کر کے ڈی این اے ٹیسٹ کیتا گیا۔صابر شاکر مطابق دوجی وار کیتا گیا ڈی این اے ٹیسٹ میچ کر گیا تے فیر عمران دی گرفتاری دا اعلان کیتا گیا۔
