قصور(پاکستان پوائنٹ نیوز23۔جنوری2018ء) زینب قتل کیس دے مرکزی ملزم عمران علی دے حوالے نال انکشافات ساہمنے آ گئے، ملزم 3سال توں اک ای تھاں رہ رہیا سی۔ پہلی واردات جون 2015وچ کیتی، ڈھائی سال وچ 9بالڑیاں نوں زیادتی دا نشانہ بنایا، زیادتی دا نشانہ بنن والی سبھ توں نِکی بالڑی دی عمر4تے سبھ توں وڈی دی عمر 9سال اے۔ تفصیل مطابق زینب قتل کیس دے مرکزی ملزم عمران علی دا ڈی این اے میچ کر گیا اے۔
جہدے مگروں ملزم دے حوالے نال انکشافات ساہمنے آ گئے نیں۔ ملزم تن سال توں اک ای تھاں تے اک ای گھر وچ رہ رہیا سی۔ ملزم نے پہلی واردات جون 2015وچ کیتی سی۔ ملزم دی زیادتی دا نشانہ بنن والیاں بالڑیاں وچ سبھ توں نکی دی عمر چار سال جدکہ سبھ توں وڈی دی عمر 9سال سی۔ زیادتی دا نشانہ بنن والیاں بالڑیاں وچ عاصمہ، تہمینہ، عائشہ، کائنات، ایمان، ارم، نورتے لائبہ سن۔ زینب ملزم عمران علی دا آخری شکار بنی۔ ملزم نے زیادتی دا نشانہ بنان والیاں 9وچوں 8بالڑیاں نوں قتل کردتا سی۔ ملزم ہتھوں درندگی دا نشانہ بنن والی بالڑی کائنات بچ گئی جو لاہور وچ علاج لئی ہسپتال وچ داخل اے۔ ملزم اک کلو میٹر دے علاقے وچ وارداتاں کردا رہیا۔
