کراچی(پاکستان پوائنٹ نیوز20۔جنوری2018ء) سکیورٹی اداریاں نے راؤ انوار دی ارباں رُپئے دی جائیداد دیاں تحقیقات شروع کر دتیاں نیں۔ راؤ انوار دے ملک تے باہرلے ملک اثاثیاں دی پُن چھان وی کیتی جا رہی اے۔ میڈیا رپورٹس مطابق ایس ایس پی ملیر معطل ہو گئے پر اوہناں دیاں اوکڑاں وچ وادھا ہو گیا اے۔ راؤ انوار اُتے ملیر وچ تعیناتی دوران ارباں رُپئے دے اثاثے بنان دا الزام اے۔
نجی ٹی وی دے وسیلیاں دا کہنا اے کہ ایس ایس پی راؤ انوار دیاں کراچی تے اسلام آباد وچ مبینہ جائیداداں دیاں تفصیلاں اکٹھیاں کیتیاں جا رہیاں نیں۔ سابق ایس ایس پی راؤ انوار اُتے ملیر وچ ریت ، بجری دی چوری تے زمیناں اُتے قبضے کرن دا وی الزام اے۔ چیتے رہوے کہ کراچی وچ نقیب اللہ محسود دی موت مگروں پولیس دی تن رکنی تحقیقاتی کمیٹی نقیب اللہ محسود نوں بے گناہ قرار دے چکی اے۔ کمیٹی نے راؤ انوار نوں معطل کر کے گرفتار کرن تے ناں ای سی ایل وچ پان دی وی سفارش کیتی اے جہدے اُتے اوہناں نوں عہدے توں ہٹا کے ناں ای سی ایل وچ پا دتا اے۔
