اسلام آباد(پاکستان پوائنٹ نیوز19۔جنوری2018ء) عوامی مسلم لیگ دے سربراہ شیخ رشید قومی اسمبلی توں استعفا دین دا اعلان کر کے آپ بیماری دا جواز بنا کے دبئی چلے گئے نیں۔ پاکستان عوامی مسلم لیگ دے سربراہ شیخ رشید نے دو دن پہلے قومی اسمبلی دی سیٹ توں استعفا دین دا اعلان کیتا سی۔ اجے تیکر شیخ رشید نے استعفا تے نہیں دتا پر اوہ استعفے دا رولا پا کے آپ دبئی چلے گئے نیں۔
شیخ رشید جمعے دی سویر اسلام آباد ائر پورٹ پہنچے جتھوں اوہ دبئی چلے گئے۔ دبئی جان توں پہلاں اوہناں کولوں استعفے بارے پُچھیا گیا تے اوہ گل گول مول کر گئے۔ شیخ رشید دا کہنا سی کہ بیمار آں، نمونیہ ہو گیا پر ہفتے نوں واپس آ جاواں گا۔ واپس آن مگروں اوہناں توں استعفا لواں گا تے آپ وی استعفا دواں گا۔ اک سوال دے جواب وچ اوہناں دا کہنا سی کہ مخالفاں نوں جُتیاں پین گیاں۔ چیتے رہوے کہ شیخ رشید نے 17جنوری لاہور وچ قومی اسمبلی دی رکنیت توں استعفا دین دا اعلان کیتا سی۔18جنوری نوں قومی اسمبلی دے اجلاس وچ استعفیاں دا چرچا رہیا پر استعفا دین کوئی نہ آیا۔
