کراچی(پاکستان پوائنٹ نیوز19۔جنوری2018ء) کراچی وچ قبائلی نوجوان نقیب اللہ محسود نوں گھروں چُکن تے اوہدی مبینہ پولیس مقابلے وچ موت بارے سوشل میڈیا اُتے کئی سوال چُکے نیں۔ ایس ایس پی ملیر راؤ انوار نے 13جنوری نوں کراچی دے علاقے شاہ لطیف ٹاؤن وچ چار دہشت گرداں نوں ہلاک کرن دا دعوا کیتا۔ ایس ایس پی راؤ انوار نے آکھیا کہ ہلاک ہون والیاں وچ مبینہ طور اُتے کالعدم ٹی ٹی پی توں تعلق رکھن والا نقیب اللہ محسود وی شامل اے پر ایہدے اُلٹ نقیب نوں نیڑیوں جانن والیاں تے اوہدے گھر والیاں دا کہنا ا ے کہ اوہ اک عام نوجوان تے بلاگر سی جہنوں فوٹو گرافی تے ماڈلنگ دا شوق سی۔
نقیب دے دوستاں نے ایس ایس پی ملیر دے پولیس مقابلے نوں جعلی قرار دتا تے دسیا کہ نقیب کاروبار دے سلسلے وچ کراچی آیا سی۔ ایہ معاملا سوشل میڈیا اُتے آن مگروں اک نویں بحث چھڑ گئی جہدے مگروں سندھ حکومت نوں ایس معاملے دیاں تحقیقات لئی انکوائری کمیٹی بنانی پئی۔ اج ای چیف جسٹس آف پاکستان میاں ثاقب نثار نے وی نقیب اللہ محسود دی موت دا آپ نوٹس لیندے ہوئے آئی جی سندھ توں آؤندے 7دناں وچ جواب منگ لیا اے۔
سوشل میڈیا اُتے نقیب دی تصویر تے مبینہ جعلی ان کاؤنٹر دیاں تفصیلاں شیئر ہوئیاں تے سوشل میڈیا ورتیندڑاں نے ایس معاملے نوں بالی ووڈ فلم دی کہانی نال جوڑنا شروع کر دتا۔ سوشل میڈیا ورتیندڑاں نے آکھیاکہ نقیب اللہ محسود دا اک مبینہ جعلی ان کاؤنٹر وچ ماریا جانا بالی ووڈ دی فلم ’جولی ایل ایل بی ٹو‘ورگا لگدا اے۔ ایس فلم وچ وی اک پولیس افسر اپنے کُجھ ساتھیاں نال رلکے اک عام شہری نوں جعلی ان کاؤنٹر وچ قتل کر دیندا اے تے مرن مگروں اوہنوں خطرناک دہشت گرد قرار دے دیندا اے۔
اِنج کرن نال نہ صرف پولیس اہلکار نوں اعلا افسراں توں شاباش ملدی اے بلکہ اوہدی پروموشن دی وی آس پیدا ہو جاندی اے۔ پر بعدوں مقتول دے وارثاں ولوں دائر درخاست اُتے فلم دا ہیرو اکشے کمار تحقیقات کردا اے۔ تحقیقات دوران پتہ چلدا اے کہ پولیس افسراں ولوں جعلی ان کاؤنٹر کیتا گیا سی جہدے تحت اک خطرناک مجرم نوں کُجھ پیسیاں دے بدلے رہا کر کے عام شہری نوں مار دتا گیا۔ عدالت وچ جرم ثابت ہون اُتے پولیس افسر تے اوہدے ساتھیاں نوں نہ صرف محکمے توں بے دخل کیتا جاندا اے بلکہ اوہناں نوں بھاری جرمانہ تے سزا وی ہوندی اے۔ سوشل میڈیا ورتینڈراں نے شبہ ظاہر کیتا اے کہ نقیب اللہ محسود دا کیس وی ایسے طرحاں دی کہانی لگدا اے۔
