اسلام آباد(پاکستان پوائنٹ نیوز15۔جنوری2018ء) تحریک انصاف نے ’جنگ‘ گروپ خلاف کارروائی لئی پیمرا نوں خط لکھ دتا اے۔ ترجمان پی ٹی آئی دا کہنا اے کہ جنگ گروپ نے عمران خان دے ویاہ دی جھوٹھی خبر نوں بار بار بلیٹن وچ وکھایا، جہدے توں عمران خان دی ساکھ نوں نقصان اپڑیا۔ پیمرا نوں لکھے گئے خط دے متن مطابق جنگ گروپ نے عمران خان دے ویاہ دی جھوٹھی خبر نوں بار بار نیوز بلیٹن وچ وکھایا۔
ویاہ دی خبرنوں عمران خان، عون چودھری تے نعیم الحق نے رد کیتا۔ عمران خان ولوں وی نکاح دیاں خبراں نوں رد کیتا گیا پر ایہدے مگروں وی ویاہ دی جھوٹھی خبر چلائی گئی۔ ایسے طرحاں جنگ گروپ نے اخلاقی پستی دا وکھالا کردے ہوئے ٹاک شوازوچ وی خبر دتی۔ جنگ گروپ نے پیمرا آرڈیننس 2002دی خلاف ورزی کیتی اے۔ خط وچ پیمرا توں مطالبہ کیتا گیا اے کہ جنگ گروپ دے مالک میر شکیل الرحمن تے رپورٹر عمر چیمہ خلاف جھوٹھی خبر دا نوٹس لیا جائے۔
