اسلام آباد(پاکستان پوائنٹ نیوز08۔جنوری2018ء) چیف جسٹس آف پاکستان جسٹس ثاقب نثار نے آکھیا اے کہ عدلیہ وچ آؤندے ہفتے اصلاحات شروع ہو جائے گی پر فیر کوئی نہ آکھے کہ اسیں مداخلت تے حدوں ودھ رہے آں۔ پیر نوں سپریم کورٹ وچ سی ڈی اے قوانین وچ ’عدم مطابقت‘ بارے کیس دی سنوائی دوران وزیر کیڈ طارق فضل چودھری عدالت وچ پیش ہوئے۔ سنوائی دوران چیف جسٹس نے طارق فضل چودھری توں پُچھیا کہ دسو ایہ سارے معاملات ٹھیک کرن وچ کِنا ٹائم لگے گا ،ایہدے اُتے طارق فضل نے استدعا کیتی کہ معاملات ٹھیک کرن لئی تن مہینے دے دیو۔
چیف جسٹس میاں ثاقب نثار نے آکھیا کہ سی ڈی اے قوانین وچ عدم مطابقت اے، بہت سارے معاملات وچ قواعد و ضابطے نہیں بنائے گئے۔ چیف جسٹس پاکستان نے وزارت کیڈ نوں سی ڈی اے قوانین وچ یکسانیت بارے قانون بنان لئی دو مہینے دیندے ہوئے آکھیا کہ دن رات مخلص انداز نال کم کرو۔ چیف جسٹس نے طارق فضل چودھری توں پُچھیا کہ کیہ پوری دنیا وچ قانون سازی کس دی ذمے واری ہوندی اے؟جواب وچ وزیر مملکت نے آکھیا کہ قانون سازی پارلیمنٹ دا کم ہوندا اے۔
چیف جسٹس میاں ثاقب نثار نے آکھیا کہ پارلیمنٹ نے کیہ اصلاحات کرائیاں نیں،عدالتی نظام وچ اسیں اصلاحات لیواں گے،عدلیہ وچ وی اک ہفتے اندر اصلاحات شروع ہو جان گیاں۔ اوہناں دا کہنا سی کہ اُنج ایہ ساڈا کم نہیں،ساڈے اصلاحات لیان اُتے فیر کوئی ایہ نہ آکھے کہ اسیں مداخلت تے حدوں ودھ رہے آں۔
