کوئٹہ(پاکستان پوائنٹ نیوز02۔جنوری2018ء) کوئٹہ دے دوالی علاقے بلیلی وچ ایف سی دی چیک پوسٹ اُتے دہشت گرداں نے آپ مارو حملا کیتا، حملے دے نتیجے وچ دو سکیورٹی اہلکاراں سنے 12بندے زخمی ہوگئے،سکیورٹی فورسز دی جوابی فائرنگ دے نتیجے وچ دو دہشت گرد وی ہلاک ۔ میڈیا رپورٹس مطابق بلوچستان وچ کوئٹہ دے دوالی علاقے بلیلی وچ دہشت گرداں نے ایف سی دی چیک پوسٹ اُتے حملا کیتا اے۔
دہشت گرداں نے چیک پوسٹ اُتے آپ مارو دھماکے مگروں فائرنگ وی کیتی۔ دہشت گرد اں دے حملے کارن دو سکیورٹی اہلکاراں سنے 12بندے زخمی ہون دی اطلاع اے۔ ایس موقعے تے کافی چِر سکیورٹی فورسز تے دہشت گرداں وچکار فائرنگ دا وٹاندرا ہویا۔ سکیورٹی فورسز دی جوابی فائرنگ دے نتیجے وچ دو دہشتگرد ہلاک ہوگئے۔ دھماکے مگروں سکیورٹی فورسز تے امدادی ٹیماں حادثے والی تھاں تے پہنچ گئیاں۔ زخمیاں نوں کوئٹہ ہسپتال منتقل کردتا گیا اے۔ سکیورٹی فورسز نے علاقے نوں گھیرے وچ لیندے ہوئے سرچ آپریشن شروع کر دتا اے۔
