لاہور(پاکستان پوائنٹ نیوز30۔دسمبر2017ء) عوامی تحریک دے آہر ہیٹھ اے پی سی نے وزیر اعلا پنجاب تے وزیر قانون پنجاب دے استعفے لئی 7جنوری تیکر دی مہلت دے دتی اے، استعفا نہ آیا تے احتجاج دی کال دتی جائے گی، اے پی سی دی سٹیئرنگ کمیٹی دا اجلاس 8جنوری نوں فیر سدیا جائے گا۔ میڈیا رپورٹس مطابق اج ماڈل ٹاؤن وچ عوامی تحریک دے آہر ہیٹھ ماڈل ٹاؤن دُکھانت تے ختم نبوتﷺ قانون وچ بدلی خلاف آل پارٹیز کانفرنس دا آہر کیتا گیا۔
کانفرنس دوران بنائی گئی کمیٹی وچ پیپلز پارٹی ولوں قمر زمان کائرہ، پی ٹی آئی ولوں شفقت محمود، علیم خان، عوامی مسلم لیگ ولوں، شیخ رشید، (ق) لیگ ولوں چودھری ظہیر الدین تے پی ایس پی ولوں وسیم آفتاب سنے ہر جماعت توں نمائندے چُنے گئے نیں۔ اے پی سی نے ماڈل ٹاؤن دُکھانت نوں بربریت دی وڈی مثال قرار تا جدکہ ختم نبوتﷺ قانون وچ بدلی دی نندیا کیتی گئی۔
ایس موقعے تے سربراہ طاہر القادری نے آکھیا کہ 31دسمبر تیکر ڈیڈ لائن عوامی تحریک نے دتی سی ہن ایہدے وچ ست دناں دا وادھا کیتا گیا اے۔اوہناں دا کہنا سی کہ قومی دولت لُٹن والے نوں کوئی این آر او نہ دتا جائے۔ ماڈل ٹاؤن دُکھانت اُتے دھرنا وی ہو سکدا اے یاں اوہناں دے اقتدار دا خاتمہ وی۔ اوہناں نے واضح کیتا کہ ایم کیو ایم نال کوئی اختلاف نہیں، فاروق ستار اجازت لے کے گئے۔ فاروق ستار دی رلت اُتے اوہناں دا شکریہ ادا کردے آں۔
