اسحاق ڈار بارے پاکستان تحریک انصاف دیاں دستاویزات ساہمنے آ گئیاں

اسلام آباد(پاکستان پوائنٹ نیوز29۔دسمبر2017ء) وزیر خزانہ اسحاق ڈار بار ے پاکستان تحریک انصاف دیاں دستاویزات دیاں تفصیلاں ساہمنے آ گئیاں نیں۔ دستاویزات وچ اسحاق ڈار خلاف نواں پنڈورا باکس کُھل گیااے۔ تفصیل مطابق پاکستان تحریک انصاف دیاں دستاویزات مطابق اسحاق ڈار تے اوہناں دے بالاں دیاں 11آف شور کمپنیاں نیں۔ اسحاق ڈار تے اوہناں دے بالاں دیاں آف شور کمپنیاں جبل علی دبئی وچ نیں۔

اسحاق ڈار نے 2004وچ چار آف شور کمپنیاں دبئی وچ بنائیاں۔ پہلی کمپنی 3مئی 2004نوں مارز اسٹیٹ لمیٹڈ دے ناں توں بنائی ۔ تن مئی 2004نوں ای جوپیٹر اسٹیٹ آف شور کمپنی قائم کیتی گئی۔ اسحاق ڈار نے تن آف شور کمپنیاں 2005وچ بنائیاں۔ دوویں کمپنیاں دے مالک اسحاق ڈار تے اوہناں دے پُتر علی ڈار نیں۔ اسحاق ڈار نے 2009وچ دو آف شور کمپنیاں ہور بنائیاں۔ ایچ ڈی ایس کمپنی دے 58ملازم نیں جدکہ علی ڈارایہدے منیجر نیں۔ ڈی ایس کے ولاز دے مالک اسحاق ڈار دے دوویں پُتر نیں۔ دستاویزات مطابق آف شور کمپنی ایچ ڈی ایس کے دے52 ملازم نیں۔ مجتبی ڈار ایچ ڈی ایس دے ایم ڈی نیں جو 50ہزار درہم تنخاہ لے رہے نیں۔حسین شریف ایچ ڈی ایس دے ملازم نیں پر اوہ تنخاہ نہیں لے رہے۔