اسلام آباد(پاکستان پوائنٹ نیوز29۔دسمبر2017ء) وفاقی حکومت نے بانی ایم کیو ایم الطاف حسین دی گرفتاری لئی برطانوی حکومت نال رابطے دا فیصلا کیتا اے۔ الطاف حسین نوں عمران فاروق قتل کیس وچ برطانیہ توں منگیا جائے گا جدکہ برطانوی حکومت دی رضا مندی اُتے عمران فاروق قتل کیس وچ الطاف حسین دے ریڈ وارنٹ جاری کرن لئی انٹرپول نال وی رابطہ کیتا جائے گا۔
انٹرپول کراچی وچ بھن توڑ تے اگ لان دے کیس وچ الطاف حسین دے ریڈ وارنٹ جاری کرن توں معذرت کر چکیا اے۔ سرکاری وسیلیاں مطابق بانی ایم کیو الطاف حسین نوں عمران خان فاروق قتل کیس وچ پاکستان لین لئی اعلا سطح اُتے مشورہ جاری اے۔ وزارت داخلا دے وسیلیاں مطابق برطانوی حکومت ساہمنے الطاف حسین دی حوالگی دا معاملا پہلے وی چکیا گیا اے پر ہن اک وار فیر الطاف حسین خلاف موجود چارج شیٹ برطانوی محکمہ داخلا نال شیئر کیتی جائے گی ۔
وسیلیاں مطابق عمران خان فاروق قتل کیس وچ الطاف حسین نوں پاکستان دے حوالے کرن دا مطالبہ کیتا جائے گا۔ وسیلیاں مطابق پاکستان وچ الطاف حسین خلاف درج مقدمیاں دیاں تفصیلاں تے عدالتاں ولوں اوہناں نوں اشتہاری قرار دین دے فیصلے وی برطانوی حکومت نال شیئر کیتے جان گے۔ وسیلیاں مطابق حکومت پاکستان دی ایہ کوشش اے کہ الطاف حسین نوں عمران فاروق قتل کیس وچ پاکستان لیندا جائے تے باہرلے ملکوں اوہناں دی گرفتاری انٹرپول راہیں کروان دی کوشش کیتی جائے گی۔
