اسلام آباد(پاکستان پوائنٹ نیوز28۔دسمبر2017ء) خواجا سعد رفیق دا کہنا اے کہ ذمے دار بندہ آں ،کدی غیر آئینی رویہ نہیں اپنایا۔ تفصیل مطابق وفاقی وزیر خواجا سعد رفیق نے ڈی جی آئی ایس پی آر دے بیان اُتے ردعمل دا وکھالا کیتا اے۔ سماجی رابطے دی ویب سائٹ ٹویٹر اُتے جاری پیغام وچ خواجا سعد رفیق دا کہنا اے کہ میں اک سنجیدہ تے ذمے دار بندہ آں۔ میں کدی وی غیر آئینی رویہ نہیں اپنایا۔
اوہناں دا کہنا سی کہ پاکستانی فوج تے اوہدے ماتحت نظام نوں کدی ٹارگٹ کیتا تے نہ ای کدی انج کراں گا۔ ریاستی اداریاں وچ غلط فہمیاں دور کرن والے ریاست نال زیادتی کر رہے نیں۔ اوہناں دا کہنا سی کہ پاکستان دشمناں دی زد وچ اے۔ ڈی جی آئی ایس پی آر اک سنجیدہ تے مثبت سوچ رکھن والے انسان نیں، اوہناں دے بیان توں دُکھ ہویا۔ اوہناں دا کہنا سی کہ میری 27منٹ دی تقریر وچوں صرف اک جملے نوں ای چُن کے اوہدے اُتے اعتراض کرنا ٹھیک نہیں۔ سانوں شکایتاں ہوندیاں نیں تے ایہدے لئی متعلقہ اداریاں نال رابطے کردے آں۔
