لاہور(پاکستان پوائنٹ نیوز25۔دسمبر2017ء) امریکا ولوں ’ملی مسلم لیگ‘ نوں کالعدم قرار دِتے جان دا امکان اے ، ایس توں وکھ امریکا ملی مسلم لیگ تے پاکستان دیاں ہور جماعتاں نوں دہشت گردی کھلارن والیاں تنظیماں دی لسٹ وچ شامل کر سکدا اے۔ قومی اخبار ’خبریں‘ مطابق بھارتی میڈیا نے رپورٹ کیتا سی کہ ٹرمپ انتظامیہ ولوں پاکستان دیاں ہور دہشت گرد جماعتاں نوں عالمی دہشت گرداں دا درجہ دین دی پیشکش دی منظوری دے دتی گئی۔
ٹرمپ انتظامیہ پاکستان دے ہور گروہاں نوں کالعدم تنظیم دا درجہ دے سکدا اے۔ کُجھ چِر پہلاں ڈونلڈ ٹرمپ دے اقتدار وچ آن مگروں چوبرجی جامعہ القادسیہ تے پشاور روڈ اُتے جامعہ حقانین اُتے ڈورن حملے دیاں اطلاعواں وی آؤندیاں رہیاں نیں۔ سینٹ دی قائمہ کمیٹی برائے خارجا امور نے ایس خدشے دا وکھالا کیتا اے کہ کیتے جماعت الدعوہ دے سربراہ حافظ سعید خلاف وی اسامہ بن الادن ورگی کارروائی نہ ہوجائے۔
امریکی دھمکی نوں سنجیدہ لینا چاہیدا۔ تہمینہ جنجوعہ نے ایس اجلاس وچ دسیا کہ امریکا ولوں حافظ سعید خلاف اک پاسی کارروائی دے بیان دی گل بات جاری اے۔ سینیٹ دی قائمہ کمیٹی اجلاس وچ سینیٹر مشاہد حسین سید نے آکھیا اے کہ امریکی صدر تے ہور حکام نے واضح دھمکی دتی اے جہنوں پاکستان ولوں سنجیدہ لینا چاہیدا۔ سینیٹر فرحت اللہ بابر نے اسامہ بن لادن وانگ حافظ سعید خلاف امریکا ولوں اک پاسی (یکطرفہ) کارروائی دے بیان دا معاملا چُکیا۔
فرحت اللہ بابر دا کہنا سی کہ امریکا نے پہلی وار اک پاسی کارروائی دی گل کیتی اے۔ امریکا نے حافظ سعید دے سِر دی قیمت اک کروڑ ڈالر لائی ہوئی اے جدکہ اسامہ بن لادن دے سِر دی قیمت ڈھائی کروڑ مِتھی گئی سی۔ فرحت اللہ بابر دا کہنا سی کہ اِنج نہ ہوئے کہ اسامہ بن لادن وانگ کوئی آپریشن ہو جائے۔ سینیٹر فرحت اللہ بابر دا کہنا سی کہ سابق فوجی سربراہ پرویز مشرف آکھدے نیں کہ حافظ سعید تے مسعود اظہر ٹھیک کم کر رہے نیں پر ایس سوال اُتے سیکرٹری خارجا نے کسے ردعمل دا وکھالا نہیں کیتا۔
