اسلام آباد(پاکستان پوائنٹ نیوز25۔دسمبر2017ء) نجی ٹی وی چینل دے پروگرام وچ گل بات کردے ہوئے مشہور پرچاکار ڈاکٹر شاہد مسعود نے آکھیا کہ کلبھوشن دی ماں تے بیوی کلبھوشن نال ملاقات لئی پاکستان آ گئیاں نیں۔ میں ایس ملاقات دی اہمیت ایس لئی ویکھ رہیا واں کہ اسیں آکھدے آں کہ کلبھوشن دا پاسپورٹ حسین مبارک پٹیل دے ناں توں سی۔ تے اپنے اعترافی بیان وچ اوہنے اپنا ناں کلبھوشن دسیا۔
ہن مسئلا ایہ اے کہ موصوف دی شناخت دااجے تیکر پتا نہیں لایا جا سکیا۔ اپنے بیان وچ کلبھوشن نے انکشاف کیتا سی کہ بھارت و چ میرا براہ راست رابطہ انیل کمار نال سی جو ’را، وچ بلوچستان دے ڈیسک دا انچارج سی پرہن اوہ بندہ پوری بھارتی خفیہ ایجنسی ’را‘ دا انچارج اے۔ ایتھوں اندازہ لایا جا سکدا اے کہ بھارت وچ بلوچستان دی اہمیت کِنی اے۔ اوہناں نے آکھیا کہ کلبھوشن دے خاندان دے پاکستان آن نوں میں اِنج ویکھ رہیا واں کہ کلبھوشن دی والدہ تے بیوی لمے چِر پچھوں اوہنوں ملن گیاں۔ ایس ملاقات وچ بھارتی ڈپٹی ہائی کمشنر وی ہون گے ۔ اہم گل اوہناں دی سکیورٹی اے۔ دوجی اہم گل ایہ اے کہ کلبھوشن دی ماں اپنے پُتر نوں کس ناں نال سددی اے، اوہ حسین مبارک آکھدی اے یاں کلبھوشن۔
