میرے اُتے کسے نے زبردستی مسلمان ہون لئی دباء نہیں پایا، پاکستان دھرتی ماں اے: سردار چرن جیت سنگھ نے بھارت دے جھوٹھ دا پول کھول دتا

لاہور(پاکستان پوائنٹ نیوز21۔دسمبر2017ء) سردار چرن جیت سنگھ نے مسلمان ہون لئی دباء پائے جان دے حوالے نال بھارتی پراپیگنڈے دا پول کھول دتا اے۔ سردار چرن سنگھ دا کہنا سی کہ پاکستان دھرتی ماں اے، میرے اُتے کسے نے وی زبردستی مسلمان ہون لئی دباء نہیں پایا۔ تفصیل مطابق سردار چرن جیت سنگھ نے مسلمان ہون لئی دباء پائے جان دے حوالے نال بھارتی پراپیگنڈے دا پول کھول دتااے۔ سردار چرن جیت سنگھ نے اپنے ویڈیو بیان وچ آکھیاکہ کُجھ دن پہلے اوہناں بارے ایہ پراپیگینڈا کیتا گیا کہ اوہناں اُتے مسلمان ہون لئی دباء پایا جا رہیا اے۔ اوہناں دا کہنا سی کہ ایہ ملک خلاف اک سازش اے۔ اسیں پاکستان وچ خش وسنے آں۔ پاکستان ساڈی دھرتی ماں اے۔ اوہناں دا کہنا سی کہ ایس گل دا اندازہ ایتھوں لایا جا سکدا اے کہ اک سکھ لئی پاکستان کِنا اہم اے کہ سکھاں دے سارے مقدس تھاں پاکستان وچ نیں۔ پاکستان وچ سکھاں لئی کوئی مذہبی تعصب دی گل نہیں اے۔ اوہناں دا ہور کہنا سی کہ مسلمان بھراواں نال ساڈے چنگے تعلقات نیں۔ اسیں اک دوجے دے غم تے خشی وچ رلتی ہونے آں۔ میرے حوالے نال دتا گیا بیان مسلم سکھ بھائی چارے خلاف سازش اے۔ پاکستان ساڈا ملک اے۔ دعا اے ایہ ہمیشہ آباد رہوے۔ یاد رہوے کہ بھارتی وزیرخارجا نے دو دن پہلے اک بیان وچ آکھیا سی کہ پاکستان وچ سردار چرن جیت سنگھ اُتے مسلمان ہون لئی دباء پایا جا رہیا اے تے سانوں ایس مسئلے نوں چُکنا چاہیدا۔