اسلام آباد(پاکستان پوائنٹ نیوز16۔دسمبر2017ء) چیف جسٹس آف پاکستان ثاقب نثار نے آکھیااے کہ اسیں آئین و قانون تے ضمیر مطابق فیصلے کردے آں۔ ساڈے اُتے کسے قسم دا کوئی دباء نہیں اے۔ اسلام آباد وچ اک تقریب نال خطاب کردے ہوئے چیف جسٹس آف پاکستان ثاقب نثار داکہنا سی کہ لوکاں نوں انصاف دینا ساڈے فرضاں وچ شامل اے۔پر ججاں نوں گالھاں کڈھنا کتھوں دا انصاف اے؟ چالو سمے وچ ججاں تے وکیلاں دی ہوند مشکل ہو گئی اے۔
اک جج لئی کم کرنا مشکل ہو گیا اے۔ وکیل موکلاں توں ڈھائی ڈھائی کروڑ فیس لے رہے نیں۔ 15ہزار رُپئے کورٹ فیس دے وکیل 25لکھ منگ لیندے نیں۔ کُجھ وکیل ڈھائی کروڑ رُپئے وی فیس دا مطالبہ کردے نیں۔ شاید اسیں اوہ معیاری انصاف نہیں دے رہے جو لوکاں دا حق اے۔ کیس بندا نہیں وکیل کیس دائر کرن دا آکھدے نیں۔آکھن تے کرن وچ بہت فرق اے۔ کیس بندا وی نہیں اے تے وکیل فیس لین لئی درخاست دے دیندے نیں۔
وکیل سائلاں توں ودھ فیساں لیندے نیں۔ اوہناں نے وکیلاں نوں مخاطب کردے ہوئے ہدایت کیتی کہ اج توں ای کلائنٹس لئی فیس ادھی کرن دا اعلان کرو۔ کیونکہ جمہوریت نہیں تے آئین نہیں۔ چیف جسٹس دا کہنا سی کہ جمہوریت دا کیہ مقام اے میں اپنے فیصلے وچ دس دتا اے۔ اسیں اپنے آئین دا تحفظ کراں گے۔ وکیلاں نوں وی چاہیدا کہ اوہ دیانتداری نال لوکائی دی خدمت کرن۔ وکیل کیس ویکھ لیا کر ن صرف پیساں ول دھیان نہ دین۔ صرف اک سال ٹیسٹ دین فیر اوہدا انعام ویکھ لین کیونکہ لوکاں نوں انصاف دینا ساڈے فرض وچ شامل اے۔ میں مننا واں کہ انصاف دی فراہمی وچ دیر خرابی اے۔ لوکائی نوں معیاری انصاف نہیں دے پا رہے، دوویں پاسیوں ہون والیاں کوتاہیاں دا ذمے وار آں۔
